2020 de erdlerzê Xarpêtî de dewanê merkezê Dêrsimî û qezayanê ci Mazgêrd û Pêrtagî de 486 keyeyan û axûran de texrîbat virazîya.  Mudirîya Şaristanan û Xoza ya Dêrsimî 486 awanîyî rijnayî. AFADî verî ke binawanîya înan virazo konteynirî dewan ra vila kerdî, herinda axûran de zî xeymî dayî. La keyeyê ke heywanê înan 3 ra kêm bîyî nêeşkayî xeyme bigêrê. Soz dîya wayîranê 486 awanîyan ke keyeyê neweyî do bêrê dayene înan la hema zî semedê ney xebatêke nêameye kerdene. 

Deweka Gultanî ya dewa Gomanî ra Polat Yeşîltepeyî da zanayene ke zimistan de keyeyê înan rijîyayî, ê zî neçare mendî ke heywananê xo bi zerarî biroşê. Yeşîltepeyî vat: ''Dewlete ma kerdî mexdûr. Xeyma ke înan daya zimistan de rijîyaye. Ma neçarîye ra koçê Depe kerd.  Ez kîra de manena.''

 Dewa Muxundî ra hemwelatî Arîf Aguşî pare kerd ke eşyayê ci erzîyayî teber û keyeyê ci yo di qatin hetê dewlete ra ame rijnayene. Aguşî vat: ''Ma nêeşkenê konteynir de bimanê. Tede ne awe, ne ceyran ne zî soba esta. Zimistan ho dîyeno. Ma do se bikerê? Ca çin o ke ma tede nan bipewjê. 2 heywanê ma zimistan de serdî ra merdî.''

Dewa Gulane ra Huseyîn Bozdagî vat: ''Înan vat ma rê keyeyanê neweyan bidê. La nêda. Wa bêrê vajê ke ê do keyeyan nêvirazê. La çîyêk nêvanê. Înan têna keyeyê ma rijnayî.'' Babîyê Bozdagî Tosun Bozdagî (76) zî îfade kerd ke 2 heywanê înan telef bîyê û ganî înan rê çareyêke bêra peydakerdene. 

Dewa Dirvarî ra Şahîn Gokalpî vat: ''Çira şarî rê nê îşkenceyî kenê? Eke ê neweyî nêviraştêne înan çira keyeyê ma rijnayî? Ma hamnanan germî ra zimistanan zî serdî ra nêeşkenê zereyê konteynirî de bimanê. Ma vera şinê AFAD û Mudirîya Şaristanan û Xoza. La ê çîyêk nêvanê.'' 

Dewa Qirixtepî ra Suleyman Ozcanî zî ard ziwan ke ey deyn kerd, pê îmkanê xo keyeyêk viraşto la hema zî kêmasîyanê keyeyî nêeşkayo peyda bikero.