Dêrsim: Ma xo vîr ra nêkerd do nêdê vîrakerdene
Bi wesîleya serrgêra Qirkerdişê Garî yê Enqere, Dêrsim de eşkerayîyêk ameye dayene. Eşkerayîye de ame vatene ke bedelê ci çi beno wa bibo ma do rayîrê raştî de xover bidê.
Dêrsim de rayberîya KESK û DÎSK’î de şehîdê Qirkerdişê Enqere serrgêra şehadetê înan de ameyî vîrardene.
Eşkerayîya ke Meydanê Seyîd Rizayî de ameye dayene de ame vatene ke êyê ke ma vînî kerdî ma do xo vîr ra nêkerê û nêdê vîrakerdene. Ma do bi girdkerdişê mucadeleyî waştişê înan bica bîyarê. Reyna Mesûr Mak û Adil Gur ê ke qirkerdiş de cuya xo vînî kerde serê goranê xo de ameyî vîrardene. Qiseykerdişan de ame vîrardene ke seba ke haştîye waştêne Enqere de 103 kesî ameyî qetilkerdene û ame vatene ke rixmê heme herişan do vera faşîzmî şar ser bikewo.
