Dêrsim de vizêr serê sibayî Hemserekê HDP’yî yê Bajarî Ozlem Toprake û Hidir Çîçek zî tede îdarekarê partîye ameyî destbendkerdene.  Rêxistina Partîya Şaran a Demokratîke ê Dêrsimî  bi tewrbîyayîşê temsîlkaranê partîyanê sîyasîyan û dezgehanê sivîlan û  wendekaran derheqê destbendkerdişan de eşkerayîyêk daye û waşt ke îdarekarê înan serbest berê veradayene. 

Eşkerayîya ke hetê vervatoxa Meclîsê Cinîyan ê HDP’yî yê Dêrsimî Nûrşat Yeşîle ra ameye wendene de ca dîya nînan: ‘‘Nê rojanê ke kongreyanê ma yê bajarî dest pêkerdî de bi nê hêrişan yeno waştene ke karê ma  bero birnayene û bi ters û xofî vernîya ma bêro girewtene. Êye ke bi nê hêrişan û bêhuqûqîye wazenê sîyasetê demokratîkî tasfîye bikerî, nêeşkenê ma sey sucdarî ramojnê. Ma meşriyetê xo Serekê Pêroyî yê AKP’yî ra  nê şarê xo û heqdarîya xo ra gênê. Bi destbendkerdiş û tepiştişan çew nêeşkeno vernîya ma bigêro. Ganî embazê ma yê ke bîlaheq ameyî destbendkerdene cade serbest bêrê veradayene. Ma biqerar ê ke ma do muadeleyê xo yê demokratîkî rê dewam bikerê. Seba ke xoverdayîş bêro xurtkerdene ganî êye ke neheqîye qebûl nêkene paştî bidê nê mucadeleyî. Ma do rixmê heme hêrişan xoverdayîş gird bikerê û ser bikewê.‘‘