Dewa Meşqûqaya Pîle qezaya Qoserî ya Mêrdînî de ca gêna. Dewe mîyanê deştêka bi kerrayan koyê Qerejdaxî de ameya awankerdene. Dewa Meşqûqaya Pîle wayîra awanîya balkêş û tarîxî ya. Labelê dewe nêna pawitene. Tarîxê Meşqûqaya pabeyê kifşkerdiş û pawitişî yo.

Dewe de dêrêkê bi nameyê Mor Gavargis esto. Awanîya dêrî yê bînan ra zaf cîya yo. Dêr, bi kerrayê volkanîk yê Qerejdaxî ameyo temamkerdene. Goreyê ê çaxî bi kerpîç û speyê hakî yeno zexmkerdene. Zereyê ci 3 qedemeyan yeno meydan û her qedeme zî 3 berê ci estê. Verê berê dêrî de bi hîrê formî xaç ameyo neqşkerdene. Goreyê ke vanê ê hîrê nîşaneyî eynî wextî de nîşaneyê keyeyê namdar û dîndarî ramojnenê. Xeylêk tarîxnasan heta nika cigêrayîşî kerdî la tarîxê dêrî hema zî nêzanîyeno.

Gola dewe zî bi destan ameya viraştene. Gole ra heta dêrî zî qenalêkê awe şino. Na gole û qenal wezîfeyêk pîl ê cuye gênê serê milê xo. Gole; sey şimitiş, weykerdişê heywanan û sewbîna lazimîyê cuye peyda kena.  

Roniştoxa dewe Fatma Ege qala dewe kerde û wina vat: “Dewa ma dewêka weş a. La çi heyf nika sey cehenemî ya. Kesê ke yenê tîya sozan danê. Dewe de kes nêmend.” Dewijî pabeyê ci yê ke meseleya çopan bêra çareserkerdene û tarîxê dewe bêro pawitene.''

Fatma Ege vat: “Verê paletî estbî. Kar û bar zehf bi. Ma cinî û camêrdî pîya xebitîyayêne. Raşta zî hişê ma sey ewro pereyî ser o nêbi. Tewr zêde wijdanê şarî pak bi. Ma karê xo yê rojane kerdêne û ma yewbînan fikirîyayêne.'' 

Roniştoxa dewe Kesume Eke vat: ''Dewa ma dewêka kahan û weş a. Eke ci rê baş xizmet bibo û bêra pawitene, her hetê ci ra boya tarîx û dewlemendî yena. Çi heyf her ke şino dewa ma çin bena. Nika dewe de têna 31 keyeyî estê. Mîyanê nê kesan de zî ciwanî çin ê. Ganî awanî bêrê viraştene û pakkerdene.”