Dewa sûryanîyan Kafro newe ra awan bena

Serranê 1990î de hetê Dewleta Tirkan ra zaf dewî amebî vengkerdene û xerabekerdene, dewa Kafro ya qezaya Mîdyatî ya Mêrdînî zî nê dewan ra ya. Na dewe hetê asûrîyan ra newe ra awan bena.

Dewleta Tirkan serranê 1990î de vera şarê kurdan polîtîkayê şerî yê gemarinî sey veşnayîş û vengkerdişê dewan, koçberkerdişê merdiman xebitnabî. Kurdîstan de 4 hezarî ra zêdêr dewî ameyî veşnayene û vengkerdene. Nê dewan ra yewe zî dewa Kafro ya ke mabênê Mîdyatî û Nisêbînî yê Mêrdînî de ya. Sûryanîyî hem seba bawerîya xo hem zî seba tewirê xo yê muxalîfî tim bîyî hedefê teda û zordarîya Dewleta Tirkan.

Bi desan Sûryanîyî hetê hêzanê fermîyan û paramîlîteran ê dewlete ra ameyî kiştene. Rîyê tedaya dewlete ra Sûryanîyan koç kerd Ewropa û Amerîka. Dewa Kafro û herêma aye bi temamî ameye vengkerdene. Koçî ra dima zî dewê sûryanîyan yew bi yew vurîyayî bîyî sey xirbeyan. Çend dûrê dewanê xo de bibê zî mezgê sûryanîyan tim erdê xo de bî. Na herême seba înan Tûrabdîn bî yanî seba sûryanîyan erdo fîraz o.

Agêrayîşê Tûrabdînî xeyalê sûryanîyan bi. Bi desan serran pabeyê ci bîyî ke xeyalê xo bîyarê ca. Serra 2007î de no xeyalê sûryanîyan bi rast. Dîasporaya sûryanîyan dima ke Dewleta Tirkan de pêvînayîşî kerdî birra girewte ke abigêra erdê xo. Sûryanîyê ke agêrayî dewanê xo dest pê viraştişê keyeyan kerd. Sûryanîyî gore xemlê tarîxî vîllayê 2-3 qatênî viraştî. Bi nê hawayî newe ra dewê xo awan  kerdî. Nêzdîyê 60 keyeyî agêrayî dewanê xo û nêzdîyê 200 keyeyî  menganê hamnanî de yenê dewan.