Qezaya Şemzînanî ya Colmêrgî de 9'ê Teşrîna Peyêna 2015‘î de Kitabxaneyê Umutî amebi bombardûmankerdene. Têkildarê hêrişî verguman Alî Kaya û Ozcan îldenîz, îtîrafkar Veysel Ateş newe ra yenê muhakemekerdene. Roniştişê 7'ine yê mehkeme, Mehkemeya Cezaya Girane ya 1'ine ya Wanî de ame dîyene.

Her hîrê vergumanê nêtepişteyî û Seferî Yilmaz o mexdur tewrê mehkeme nêbîyî. Avûkatî mehkeme de amade bîyî. Avûkatanê vergumanan îdîa kerd ke dewa kumpas a û waşt ke tedbîrê "kontrolê edlî" yê derheqê muwekîlan de bêro wedaritene. Avûkatanê dewa ra Hetkarê Serekê Baro yê Wanî Hamza  Çîftçîyî ard ziwan ke wazenê serebûtî orteyî ra wedarê û vat: "Kes nêeşkeno nê hêriş seke tewr nêbîyo bihesibno û nêeşkeno vaje kes nêmerdo yan zî birîndar nêbîyo. Kifş û eşkera yo ke vergumanan no suc kerd. Ê wazenê ke dosya pa bidê. La ma do nê qebul nêkerê û ma wazenê seba vergumanan qerarê tepiştişî bêro dayene." Heyetê mehkeme qerar da û waşt ke kontrolê edlî dewam biko û seba ke kêmasîyê dosyaye biqedê mahkeme taloqê 17'ê Kanûna 2019'î kerd.