Wendekarê zanîngehî Kemal Kurkut serra 2017î de wexto ke tewrê fîrazkerdişê Newroze yê Amedî bî hetê polîsan ra ame qetilkerdene. Derheqê polîsê kiştoxî Y.Ş. de sucê ''kiştişê bizanayîşî'' ra dewa ameye akerdene. Roniştişo 8. ê dewa ame dîyene. Roniştiş Mehkema Cezaya Girane ya 7. ya Amedî de ame dîyene û polîso sucdar Y.Ş. û avûkatê ci zî roniştiş de amade bîyî. Dadîya Kurkutî Secane û kekê ey Ferhat Kurkut û avûkate Reyhane Yalçindage zî tewrê roniştişî bîyî.

Edlîye û korîdorê salona roniştişî hetê polîsan ra ameyî dormegirewtene. Nêzdîyê 15 polîsî kewtî salona roniştişî û roniştiş teqîb kerd.

Roniştiş de seba çareserkerdişê nakokîyanê mabêna raporanê pisporan raporê pisporanê Dezgehê Tipê Edlî ame wendene ke tede ameyêne îdîakerdene ke ''seba ke fîşek gina zemînê huşkî ro zît bîyo gina bedenê ro." Mehkeme îfade kerd ke sucdar Y.Ş. mabênê roniştişan de raporê waştişnameyê pawitişî sey nuştekî da.

Polîsê sucdarî Y.Ş. derheqê raporê dezgehê tipê edlîyî yê Îstanbulî de qisey kerd û pawitişê xo yê ke mabênê roniştişan de kerd dibare kerd. Dadîye Secane Kurkut vat: "Kemal bêsuc bi. Beno ke qefilîyaye bi, a rojê bêhewn bi."

Avûkata keyeyê Kurkutî Reyhane Yalçindag zî nêrazîbîyayîşê xo vera raporê pisporan nîşan da û da zanayene ke pêro raporî hetê heman dezgehan ra ameyî amadekerdene.

Yalçindage vat: "Ma pê bawer ê ke dosya rê mudaxele ame kerdene."

Heyetê mehkeme bire daye ke roniştiş taloqê 24ê adare bibo.