Gerîlayê HPGyî Tolhildan Tekman (Yilmaz Uzun) 2020 de Sêrt de hêrişê hewayî yê dewleta tirke ya îşxalkere de pa 5 embazanê xo şehîd bibi. Dewleta tirke cenazaya Tekmanî hîrê serran keyeyî ra nimnaye û waşt ke keye şoro verê bînaya HDPyî ya Amedî de ronişo. Seba ke keyeyî no qebul nêkerd dewlete cenaza  zereyê qutuyî de daye ci.

Babîyê Tolhildan Tekmanî Îbrahîm Uzunî ANFyî rê qala serebûtanê ke ameyê sereyê înan kerde.

Uzuno ke qezaya Tatosî ya Erziromî de maneno, da zanayene ke 2020 de Asayîşê Îstanbulî venga ci dayo, ci rê vato 'Lajê to şer de merdo, ganî şima testê DNA bikerê.' Babî Uzun hewteyêk Sêrt de mend û peynî de tira nimûneya gonîye seba testî ame girewtene. Dima ey rê ame vatene ke 'Ma do mîyanê 6 mengan û serrêke de cewab bidê to.'

5 mengan ra dima Qereqolê Polîsan ê Vatanî venga Îbrahîm Uzunî da. Qereqol de babî Uzunî ra ame waştene ke wa şoro verê bînaya HDPyî de koma AKPyî reyde ronişo. Babî Îbrahîmî no red kerd. Dewlete hewte de rayêke eşt keyeyê Uzunî ser.

Uzunî vat: ''Mi qereqol de înan rê vat ke înan vato lajê mi merdo. La înan vat 'Lajê to weş o, eke ti şorî verê bînaya HDPyî bi rayîrê înternetî şima do qisey bikerê.' Mi înan rê vat 'Îradeyê lajê min o azad o. Ez mudaxele nêkena û bêrûmetîyêka winayêne nêkena.' Nê qiseyan ra dima înan hînî venga mi nêda. 

Mi e-devlet de dî ke 2021 de dozgerîye mergê lajê mi îlan kerdo û nufusî ra o veto. Dewlete zanayêne ke lajê mi merdo la lajê mi nimna û goristanê bêkesan de kerd bin erdî. Seba girewtişê cenaza mi muracat kerd. Mi gor akerd û qutuyêko qij dî. Lajê mi 1.85 cm bi la zereyê qutuyêkê qijî de bi. Seba ke wesayîtê cenaza nêdîya mi, pê îmkananê xo mi wesayîtêk peyda kerd. Wexto ke mi qutu akerd, ez mat bîya. Zereyê qutuyî de tay kavanozî est bîyî û parçeyê lajê mi zî mîyanê nê kavanozan de bîyî. O çax dinya mi ser o rijîyaye. Mi vat ke werrekna qîyamet werzo. No exlaq nîyo.

Ma kewtî rayîrî, cenaza berdêne Tatosî. Wesayîtê polîsan verê ma de goreyê keyfê xo şîyêne. Mabênê Sêrt û Erziromî 6 saet ê la 20 saetan de şîyî. Şan saete 22.00 de ma resayî dewe. Dewe de her ca de leşkerî ameybî cakerdene. Leşkeran nêverda ke dewijî şorê goristanî. Ma nêeşkayî venga malayî zî bidê. Merdimêkê ma mala bi. Ey wecîbeyê dînîyî kerdî. Dewe gêrîyabî binê ablûqa. Ma waşt ke seba xeyrî goflet û bîskuvîyan vilayê domanan bikerê la leşkeran domanî tersnayî û nêverda.''

Uzunî ard ziwan ke heyetê HDPyî rixmê pêro astengîyan zî zîyaretê înan kerdo û heyetî vato ke ê do babete berê mehkeme.