Dewa Çayustuyî ya qezaya Pulurî ya Dêrsimî 1994 de hetê dewlete ra amebî vengkerdene û vêşnayene. Dewijî 2013î ra nata agêrenê erdê xo. Dewijî xîret kenê ke dewa xo newe ra awan bikerê la dewe de ceyran û awa şebeke çin ê.  

Dewe de 8 keyeyî estê û nê zî zêdêr kokim ê. Hacîme (71) û Huseyîn (83) Aktaş 8 serrî yo dewe de bêceyran cuya xo rê dewam kenê û xo amade kenê ke verê walîtîye de vera rewşe çalakîya roniştişî bikerê.

Hecîme vana: "28 serrî yo vernîya ma gênê, astengîyan vejenê. Ma do senîn biciwîyê. Çimê ma nêvînenê. Şan de beno hema ma şinê mîyanê nivînan. Jeneratorêkê ma yê qijî estê. Ma nê zî tena di saetan semedê dolabe xebitnenê ke xidayî xira nêbê. Ma werdê xo zî serê adirî de viraznenê. Pêwa nê emrê xo ez cil û firaqan bi destan şona. Semedê awe çin a, ma nêeşkenê ramitiş zî bikerê. Hîn darê ma verê berî de estê, heywanî înan şiknenê. Semedê ceyran çin o ma nêeşkenê mudaxele zî bikerê. 28 serrî yo cuye çin a. Ma se kerd zî bê netîce mend."

Huseyîn zî wina vano: "Dewlete PKK kerd bahane û dewa me vêşnaye. Ma bi serran dewa xo ra dûr mendî. 19 serrî dima ma ameyî. La dewe wêran bibî. Ma bi deyn keyeyê xo awan kerd. La ceyran nêdanê. 8 serrî yo ma mîyanê tarîye de yê. Bi desan rey ma muracat kerd. La qet ma goşdarî zî nêkerdî. Semedê ceyrançin o, şan de ma heywanê xerîbî ke yenê verê berî zî nêvînenê. Tena ceyranney, awe û rayîr zî çin o. Ma nêeşkenê baxçeyê xo awe bidê. Dewe de cuye nêverdaye. Ma şîyî verê keyayî. Eke problemê ma nêrê çareserkerdene ma do verê walîtîye de dest bi çalakîya protestoyî bikerê. Êdî bes o."