Grevê vêşanîye yê Leyla Guvenê kewt roja xo ya 121’ine. Hetê bînî ra grevê vêşanîye vila benî. Amed de parlamentera HDP’yî ya Amedî Dersîm Dage bi grûbêk dest bi grevî kerd bi. Parlamenterê HDP'yî Tayyîp Temel û Mûrat Sarisaçî zî dest bi girevî kerd. 5 Çalakwanê Amedî yê  ke ameyîbî destbendkerdene, serbest veradayîşî ra dima banê HDP’yî Amedî çalakîya xo rê dewam kenî.

Tayyîp Temelî derheqê çalakîye de nê vatî: ‘‘Grevê vêşanîye seranserê dinya ra vila bîyî la îktîdar hema vera naye bêvêng o. Hukmatê AKP’yî vera Birêz Ocalanî qanûnanê xo zî gêno binê lingan û suc keno. Şexsê  Ocalanî de tecrîd ma hemeyan ser o yeno bicaardene.Îktîdaro sîyasî hîrê meymûnan kay keno. Na bêvêngîye nêna qebûlkerdene. Bêvêngîye merg ana, zulm ana. Ma vîcdanê hukmatî ra nê vîcdanê şarî ra paşt gênê. Bêvêngîye suce rê wertaxîye ya. Eke ma ewro vengê xo mevejê siba zaf beno erey. Xoverdayîşê 1982’î yê  Kemal û Xeyrîyan û xoverdayîşê Leyla û Nasiran yew o. Şarê ma ganî vera naye vengê xo berz bikero, kam dest ra çi yeno wa bikero. Tena bi xoverdayîş ma eşkenî vernîya mergan bigêrê.‘‘