Artêşa tirke ya îşxalkere 14ê nîsane ra nata pê çekanê kîmyewîyan û bombayanê qedexekerdeyan hêrişê Herêmanê Pawitişî yê Medya kena.

Dîmenê di gerîlayanê ke Warê Xoverdayîşî yê Werxelê yê Avaşînî de raştê hêrişanê kîmyewîyan ê artêşa tirke ya îşxalkere ameyî resayê destê ma. Dîyeno ke nê çekî sîstemê sînîr û helmdayîşî felç kenê û vîrê merdiman benê.

Dîmenan de aseno ke leşkerê tirkî kewenê mîyanê tunelanê şerî yê gerîlayan  û dima zî çekanê kîmyewîyan erzenê mîyanê tunelanê şerî.

Gerîla Zîlane Mêrdîna ke cade mudaxeleyê wird gerîlayan kerdo û bîya şahida hêrşî vat: ''Dişmen Werxelê de hema hema her roje hêrişanê kîmyewîyan keno, gazanê kîmyewîyan şuxilneno.

Embaz Baz û Helbeste rojanê cîyayan de la bi heman hawayî raştê çekanê kîmyewîyan ameyî. Dima ke teqayîşêko pîl qewimîya embazan ra veng nêvejîya. Ma resayî embazan û ê ardî tîya. Embazanê ma vat ke uca de boya kîmyewîye çin bîye ka gazo grî est bi.

Wexto ke ma embazî girewtî zereyê tunelan verî vîrê înan çin bi. Dima seke xo ra şîyê bi hawayêkê bêkontrolî têgêrayî û huyayî. Dima ke hişê înan şi û wirdî zî şehîd bîyî.

Embaz Helbeste bêkontrol qisey kerdêne. Gazê kîmyewî tesîrê sîstemê ci yê sînîrî kerdo û fîzyolojîya ci ya normale xeripnayo. Ma zanenê ke gazê winasênî destê dewleta tirke de est ê û tira vanê 'gazê sînîrî.' Mîyanê nê gazan de madeyê sey sarinî est ê. Cayanê girewteyan de nê gazî eşkenê merdiman bikişê. Armancê nê gazan no yo ke merdim bêhal biverdê ke merdim nêeşko şer bikero.

Wexto ke embazan embaz Baz ardbi vîrê ey zî şibi. O zî seke gêj bîyo têgêrayêne. Hişê ci qefilîya. O nêeşkayêne nefes bigêro, lerzayêne û tim eraq vetêne. Yanî ey kerdêne ke o jehr bedenê xo ra bierzo teberî.

Embaz Baz, Helbeste û Demhat hetê ma de bi hêrişanê kîmyewîyan şehîd bîyî. Ma nêeşkayî embazan bixelisnê. Hema zî vera ma hêrişê kîmyewî est ê la ma xo ver danê. Embazê ma tunelanê şerî de xo ver danê. Wa her kes bizano ke her şehadet hêrs û kînê ma zêdîneno. Ma do qetî ser bikewê.''