Merkezê Îrtîbatî û Çapemenîye yê HPGyî (HPG-BÎM) 30ê gulana 2022yî de eşkerayîya xo de vatbi ke 29ê gulane de mewzîyanê şerî yê Şehîd Berxwedanî yê Warê Xoverdayîşî yê Şehîd Şahînî de mabênê gerîlayan û artêşa tirke ya îşxalkere de pêkewtişî qewimîyabî. HPG-BÎMî eşkerayîye de dabi zanayene ke dewleta îşxalkere pê zorî efseranê xo şawena tunelanê şerî û vatbi:

''29ê  gulane de grûbêka leşkeranê payeberzan waşt leşkeran bişawa warê Şehîd Berxwedanî yê Warê Xoverdayîşî yê Şehîd Şahînî û leşkeran seba ke nêwaştêne aver şorê mabênê înan û efseran de nîqaşî qewimîyayî. Nê îşxalkerî hetê hêzanê ma ra bi taktîkê sabotajî ameyî pirodayene. Teqayîş de 2 îşxalkerî kaşî ra ginayî war û 2 îşxalkerî pê çekanê ferdîyan ameyî pirodayene. Çalakîye de 4 îşxalkerî ameyî cezakerdene û çeke û malzemeyê înan o leşkerî ame îmhakerdene. 2 cenazayê îşxalkeran binê kontrolê hêzanê ma de yê. Saetanê şanî de îşxalkerî reyna ameyî pirodayene û verê înan ame girewtene.''

La artêşa îşxalkere derheqê leşkeranê kişteyan de xeberê zûrî servîsê komelê Tirkîya kerdî. Eşkera bi ke cenazaya Nûrî Melîh Bozkurto ke dewleta tirke vatbi nêweşxane de merdo, destê gerîlayan de ya. Dîmenê cenaza zî hetê gerîlayan ra ameyî girewtene. Gerîlayo ke dîmenan de qisey keno vano ke leşker verî ke bimiro vano nameyê ci Mîlîhî yo. Heman gerîla ano ziwan ke heman pêkewtişî de di leşkerê bînî ameyî cezakerdene û cenazayê înan ameyî berdene bi teberî.

HPG-BÎMî derheqê Nurî Melîh  zî tede 4 leşkeranê ke 29ê gulane de ameybî cezakerdene de agahîyê neweyî dayî:

''Embazê ma verî ke nê leşkeran hedef bikerê bi saetan înan teqîb kenê û goş nanê ser. Heta fam kenê ke nameyê nê leşkeran Burak, Îslam û Melîh ê. Embazê ma nê leşkeranê ke pê zorî erşawîyenê tunelanê şerî ceza kenê. Seba ke cenazayê înan bêrê girewtene wirdêminî teber de verdenê. Embazê ma wazenê birîndarê giranî Nurî Melîh Bozkurtî cayêkê sakînî de muhafeza bikerê. La no leşker dima ke vano nameyê ci Melîh o mireno. Seba ke deleta tirke pêro vînîbîyayîşanê xo nimnena embazê ma nameyê nê leşkerî qeyd kenê. Dima cenazaya ey zî teber de verdenê. La dima eşkera bi ke artêşa tirke herinda ke nê cenazayan bigêra kendalan ra erzena war. Ma nê zanenê ke cenazaya nê leşkerî Melîhî rê se bîyo.''

HPG-BÎMî îfade kerd ke dewleta tirke derheqê mergê Nurî Melîh Bozkurtî de zûran kena û vat: ''Mîsal dewlete vana Melîh Bozkurt nêweşxane de bîyo, birîndar bîyo û nêxelisîyayo. La o leşker Zap de merd. Eşkera nîyo ke cenazaya ci ameya girewtene yan nê. Dewlete komelî xapînena. Ma verê cenazayanê înan de zî hûrmet kenê la ê bi hawayêkê tewr barbarî nêzdîyê cenazayanê ma benê.

Dewlete sey DAÎŞî nêzdîyê cenazayanê embazanê ma bena, cenazayanê ma rê îşkence kena û bi metodanê wehşîyan heqaret kena. Derheqê nînan de destê ma de zaf belgeyî est ê. Dewleta tirke rojêke qetî do verê tarîxî de, wijdanê merdimîye de û warê mîyanneteweyî de bêra muhakemekerdene û hesabê nê kerdişanê xo bida. Beno ke dewlete nika vana qey pê îşkenceyê vera cenazayanê ma vera şarê ma şerê psîkolojîkî kena û bi nê hawayî do ser bikewa. La no tewirê înan do tewr zaf zerar bido înan.

Ma her roje medya ra teqîb kenê ke polîs û leşkerê ke psîkolojîya înan xirab a, verî xo dima zî merdimanê xo kişenê. Nê pêro kerdişî pê wehşetê vera Kurdîstanî eleqedar ê. Ê vanê qey hetê psîkolojîkî ra ma qels kenê la ma dî û do bivînê ke a raşte ê pê qels benê, bin kewenê.''