Sîyasetmedarê kurdî Dr. Mehmûd Osmanî hêrişê îşxalî, tewirê hukmatê Iraqî û Hukmatê Herêma Federale ya Başûrê Kurdîstanî û yewîya neteweyîye ANFyî rê ercnayî.

Osmanî ard ziwan ke hêrişê îşxalî yê Tirkîya newe nîyê û vat: ''Hukmatê Erdoganî û Anqara tim vera destkewteyanê kurdan ê û qetî girîngîye nêdaye kurdan ser. Dewleta tirke tirkbîyayîş kurdan rê ferz kena. Anqara 35 serrî yo vera kurdan şer kena la heta nika netîceyêke nêviste destî. Tirkîya vera kurdan sîyasetê nîjadperestîye ana ca. Hêrişê îşxalî yê nikayênî zêde û hîra yê. Tîya de babete PKK nîya babete kurd û îşxalê erdê Kurdîstanî ya.''

Osmanî bale ante bêvengîya hukmatê Iraqî û Hukmatê Herêma Federale ya Başûrê Kurdîstanî ser û vat: ''Tirkîya serwerîya erdê Iraqî binpay kena. Ganî Iraq biwazo ke Tirkîya erdê ci ra veja. A raşte ma vînenê ke Iraq bi hawayêkê nimiteyî tay babetan de hetê Tirkîya de ca gêno. Reyna hukmatê Herêma Kurdîstanî, Neteweyê Yewbîyayeyî û Yewîya Ewropa vera hêrişan bêveng ê. Tirkîya zî nînan ra hêz gêna û hêrişê Rojawan, Başûr û Vakurî kena. Ganî hukmatê Herêma Kurdîstanî bêveng nêmano û PKKyî reyde dîyalogan bikero. Ganî hukmatê Başûrî û PKK îtîfaq bikerê û rayîr nêdê îşxalê Tirkîya. ''

Osmanî eşkera kerd ke dewleta tirke wazena erdê Kurdîstanî de kurdî bikewê pê û vat: ''Kurdan birakujî ra dersê tarîxî girewtî. Dewleta tirke wazena kurdî vera yewbînan şer bikerê la no mumkîn nîyo. Şerê zereyî xeta sûre ya kurdan a. Yewîya neteweyî her çîyî ra girîng û lazim a. Ganî rêxistin û partîyê kurdan tim dîyalog bikerê û yewbînan rê ardim bikerê. Ganî yewîya neteweyîye cade bêra ronayene. Dişmenê ma Iraq, Tirkîya, Îran û Sûrîye yew ê. Ganî ma zî bibê yew. Ganî kurdî plananê Tirkîya rê îmkan nêdê.''