Endamê verênî yê Heyetê Îdareyî yê PDKyî Edhem Barzanîyî vizêr derheqê îşxalê dewleta tirke yê vera Başûrê Kurdîstanî de Serekîya Herêma Kurdîstanî, Iraq, Neteweyanê Yewbîyayeyan, partîyanê sîyasîyan û rêxistinanê komelê sivîlî rê mektubêke erşawite.

Edhem Barzanîyî mektuba xo de vat ke Kurdîstan kewto verê pêlêkê bînî yê îşxalê artêşa tirke û wêrankerdişê xoza. Barzanîyî îfade kerd ke artêşa tirke erdê Başûrê Kurdîstanî de qasê 40 kîlometreyan aver şîya û hemwelatîyê Behdînanî herême ra neçarîye ra hê koç kenê.

Metube ra dima Edhem Barzanî raştê tay nêrazîbîyayîşan ame.

Edhem Barzanîyî derheqê babete de ANFyî rê qisey kerd û da zanayene ke o nêeşkeno binê îşxalê dewleta tirke de bimano.

Edhem Barzanîyî vat: ''Ez qet erdê Kurdîstanî ra nêreman. Wextêkê nêzdîyî de ez do pê Têgêrayîşê Şarî yê Şorişgêrî abigêra erdê xo ser. Xebatê min ê seba ney dewam kenê. Bawerîya mi bi qet yew partîye çin a. Ez têna pê Têgêrayîşê Şorişgêrî bawer a. Karê min ê Têgêrayîşê Şarî yê Şorişgêrî dewam kenê û ez do nêzdî de abigêrê Kurdîstanî.''

Barzanîyî mektube de bale antbî ser ke daristanê Başûrî bi hawayêkê sîstematîkî hetê artêşa tirke ra yenê vêşnayene. Barzanîyî vat: ''Ez venga îqtîdar û pêro terefanê mesuldaran dana ke se kenê bikerê la verê na teda û îşxalî bigêrê. Sey tecrubeyê verênî eke dewleta tirke cayêk de ca biba hînî tira nêvejîyena. Îsbatê ney o tewr gandar zî Qibris û Îskenderîye yo. Wextê ci ameyo ke ma pîya bi hawayêkê neteweyî vera îşxalî tewirêkî bimojnê.''