Çimeyê Munzurî çimeyê esasî yê Çemê Muznurî awan kenê û nasnameyê pîrozî vejenê werte. Awa ke zinarê qilê Munzurî ra herikîyena, dîmenêkê heybetinî vejena werte, hetê hemwelatîyan ra eleqeyêkê pîlî vînena. Çimeyê Munzurê ke goreyê bawerîya Raya Heqîye fîraz ê cayê zîyaretî yê. Elewîyî tede findan visnenê ta, waştişanê xo anê ziwan.

Goreyê efsaneyêkî şiwanê bi nameyê Munzurî  dewêka qilê koyî de ciwîyeno. Satilê şitî yê Muznurî derg o û vera ke şit rijîyaya, awe erzena û wina çimeyê Munzurî awan benê. Munzur bîyo babeta efsan û sanikan û şahidîya Terteleyê Dêrsimî kerda. Goreyê vatişan wextê Terteleyê Dêrsimî de awa Munzurî bi mengan sûr bîye. 

 Şarê Dêrsimî û şarê teberî bi taybetî hamnan de verê xo danê Çimeyanê Munzurî û xozaya ci tehm kenê. 

Melîsa Gozena ke karkera tekstîlî ya û Xarpêtî ra semedê gêrayîşî ameya Dêrsimî pare kerd ke key wisar dîyeno Munzur bi coş herikîyeno û vat: "Dorê Çimeyanê Munzurî de nebatê tewir bi tewirî zergûn benê. Xozayêke wina weş a ke, vengê awe, awe bişimne, vilikî... Her çî zaf weş o. Ez her tim yena. No eynî wextî de merkezê bawerîye yo. Gama ke ma yenê ma findan fînenê ta û waştişan kenê. Ez xo zafbaş hîs kena. Bihizûr hîs kena."

Dîlek Kaya zî Xarpêtî ra ameya. Dîleke bale ante serê girîngîya Çimeyanê Munzurî û wina vat: "Ma semedê tîya çi vajê kêm maneno. Bi xoza û manewîyatê xo tîya cayêko taybet o. Ez her wext yena. Her rey yena bihizûr şina. Semedê ney zî her kesî rê pêşnîyaz kena. Gereka ma wayîrê ci vejîyê. Ganî ma wayîrê awe û tarîxê xo vejîyê. Xeylêk girîng o ke hizûrê tîya xira nêbo."