Endamê KNKyî û sîyasetmedar Dr. Mehmet Emîn Pencewînîyîy derheqê hêrişanê îşxalî yê neweyan û tewirê PDKyî de ANFyî rê qisey kerd. 

Pencewînîyîy vist vîrî dewleta tirke Îran û Iraqî reyde hîrê serrî yo amadekarîya hêrişanê neweyan kena û Erdogan zî na çarçewe de ameyo Başûr û Iraqî. Pencewînîyî bale ante ser ke Wezîrîya Pawitişî ya Iraqî vato ke ê beşdarê hêrişanê dewleta tirke yê vera PKKyî nêbê û vat: ''Iraqî vat ke ê PKKyî sey rêxistinêka terorî nêvînenê. YNK û Serekê ci Bafel Talabanîyî zî vat ke ê tewrê şerê Tirkîya nêbê. 

Tirkîya Îranî ra zî waşt ke hêrişê PJAKî bikero la Îranî no qebul nêkerd. Vanê ke beşêkê hêzanê Herêma Kurdîstanî do tewrê nê şerî bibo. Yeno vatene ke no beş hêzê PDKyî yê. La hetê dewleta tirke de hêrişê PDKyî yê vera gerîlayan seba şarê kurdî do bibo felaketêko pîl û rewşêka winayêne de derba verêne do Başûr biwera. Eke hêzê kurdan bidê hêzanê kurdan ê bînan ro yewîya neteweyîye do zerar bivîna.''