21ê sibate de seba ziwanê kurdkî bibo ziwano fermî û perwerdeyî Torra Ziwan û Kulturî û Platformê Ziwanê Kurdkî pîya kampanyaya îmzayan daye destpêkerdene. Kampanya bi hawayêkê onlineyî yena caardene. Vervatoxê Platformê Ziwanê Kurdkî Şerefxan Cizîrî derheqê xebetanê înan de ANFyî rê qisey kerd.

Cizîrî da zanayene ke Platformê Ziwanê Kurdkî 2018 de hetê 9 partî û têgêrayîşanê kurdan ra ame awankerdene. Cizîrîyî vat: ''Ma 21ê sibate de Torra Ziwan û Kulturê Kurdan reyde pîya kampanyaya îmzaya daye destpêkerdene. Ma pê na kampanya armanc kenê ke hîşmendîya kurdan berz bikerê. Heta nika sîyasetmedaranê ma bi kurdkî qisey nêkerd, roşnvîran bi kudkî nênuşt, dezgeh û sazgehanê ma de kurdkî nêame qiseykerdene. Pê na kampanya ma wazenê peynîya naye bîyarê.

Wa keyeyî domananê xo reyde bi kurdkî qisey bikerê, şaredarîyan de kurdkî zaneyeyî bixebitê. Ma no waştiş hemşaradaran rê pêşkêş kerd la o çax qeyûmî herinda înan de ameyî tayînkerdene. Ma waşt ke namzetê şaredarîyan ya kurdkî bizanê yan zî bimusê. Tay merdimî nê waştişî qij vînenê û vanê nika wextê ney nîyo. La eke ma nika wayîrê ziwanê xo nêvejîyê do destê ma ra şoro. ''

Cizîrî eşkera kerd ke heta nika înternet de înan 20 hezar îmzayî arê dayî. Cizîrîyî vat: ''Ma wazenê têna kurdan nê şarê bînî zî paştî bidê ma. Armancê ma bi mîlyonan îmza yê. MA wazenê bi nê hawayî hukmatî rê teda bikerê ke wa kurdkî bibo ziwano fermî û perwerdeyî. Ganî çapemenîya kurdan seva kurdan xebate bikera. Ganî kanalan de rojdem tim ziwan bibo.''