Endama Konseya Serekîya Pêroyî ya KCKyî Elîfe Ronahî bîye meymana bernameyê taybetî yê Medya Haber TVyî û rojdem ercna. Qiseykerdişê Elîfe Ronahî ra beşêk wina yo:

''Hemleya Wextê Azadîye aver şîye. Ez embazanê ke zîndanan de, Kampa Lavrioyî û Kampa Mexmûrî de grevê vêşanîye de yê fîraz kena. Pêro dinya de sendîkayan ra heta têgêrayîşanê enternasyonalîstan, akademîsyenan, entelektuelan û sîyasetmedaran eşkerayîye daye, seba azadîya Rayberîye îmza daye. Seba ke paradîgmaya Rayberîye tesîrê xeylêk waran kerd sîstemê modernîteya kapîtalîste naye ra tersena. Ma eşkenê vajê ke hemleya ma zaf ser kewta. Labelê hema a aste de nîya ke azadîya Rayber Apoyî bîyara ca.

Çarçewa Planê Çinkerdişî de dewleta tirke ya faşîste 2014 ra nata vera gerîlayan hêrişê hîrayî dayî destpêkerdene. La dişmen nêeşka ser bikewo. Tirkîya hetê ekonomî, sîyasî, komelkî û kulturelî ra rijîyaye û nêeşkaye vera PKK û şarê kurdî ser bikewa. Erdogan û Bahçelî seba qirkerdişê kurdan û gerîlayan destê înan ra çita bêro kenê. Hêrişê nikayênî yê vera gerîlayan na çarçewe de yenê kerdene.

Dewleta tirke paştdayîşê NATOyî girewt, kurdê hemkarî pê vateyê 'Eke PKK çinbo şansê şima esto' girewtî hetê xo. Qatar zî nê şerî fînanse keno. Dewleta tirke nêverdena sey verî no şer bêro rojdem, kişteyanê xo nimnena. Gerîlayî her roje 9-10 leşkeran kişena. La Tirkîya naye nêvana. Dewleta tirke wazena Herêmanê Pawitişî yê Medya de ca bida xo, uca de mende biba.

Tirkîya de 40 serran de çend hukmatî vurîyayî? Nê hukmatî nêeşkayî PKK biqedînê. Nika Erdogan zî na aste de yo. Hêrs û waştişê qirkerdişî yê vera kurdan Tirkîya rijnenê. Coka têkoşînê gerîlayan girîng o. Ganî şarê ma na raştîye bivînê.

Warê Hewayî yê Amedî semedo ke zeraro pîl nêaso mengêke ame qefilnayene. Şerê gerîlayan moral û hêz dano şarê ma. Xoverdayîşê gerîlayan derbêka pîle daye dişmenî ro. Bi taybetî gerîlayê YJA-Starî bedelanê giranan danê. Gerîlayê YJA-Starî seba cinîyanê dinya mesuldarîya xo anê ca û şer kenê.

Dewleta tirke wazena komelê kurdan çin bikera. Bi taybetî Vakurê Kurdîstanî de her roje merdiman rê ahanîye ferz kena, merdiman rê gef wanena. Şarê ma zî ganî nê ajanan îfşa bikera. Eke şarê ma mesuldarîya xo bîyaro ca, şerê şarî yê şorişgêrî bikero o çax ma do ser bikewê. Verê ma de firsendê tarîxîyî estê.

Sey gerîlayan û têgêrayîşê azadîye ma do heta peyêne têkoşîn bikerê.Ne dewleta tirke ne zî hezêko bîn nêeşkeno gerîlayan koyan ra dûrî bigêro. Nika firsendê ma, şert û mercê ma yê şorişî zaf xurt ê. Ganî ma nînan hol biercnê.''