Keyeyê Şenyaşarî Riha de pê welatperwerîye û merdimîya xo şinasîyeno. Keyeyê Şenyaşarî 2014 de berê xo kobanêyîjan rê akeno ke nê kobanêyîjî hêrişanê DAÎŞî ra remayî. Emîne Şenyaşar wina qala ê rojan kena:

''Êyê Kobanê ra ameyêne sey ma kurdî bîyî. Ma ê keyeyê xo de kerdî meyman, miqatê înan bîyî.  Dewe de yew keyeyê ma estbî. Haci Esvet (mêrdeyê Emîne Şenyaşar) o keye da rojnamegeran û pêro hewcedarîyê înan peyda kerdî.

14ê hezîrana 2018î de Wekîlê AKPyî Halîl Îbrahîm Yildizî Pirsûs de keye û dikanî zîyaret kerdêne. Yildiz şino dikana Şenyaşaran zî û înan rê gef waneno keyeyî ra raye wazeno. Keyeyê Şenyaşarî naye red keno. Dikane de serebût qewimîyeno. Netîceya serebûtî de Celal Şenyaşar (41) û Adil Şenyaşar (36) bi giranî, Mehmet, Fadil û Ferît Şenyaşarî zî reyna bi hawayêkê şenikî birîndar benê. Emîne Şenyaşar û mêrdeyê ci Haci Esvet Şenyaşar şinê nêweşxane ke domananê xo bivînê. La verê çimanê Emîne Şenyaşar de mêrde û 2 lajê ci yenê lînçkerdene û qetilkerdene.

Keyeyê Şenyaşarî pê çekanê giranan dekeweno nêweşxane û keyeyê Şenyaşarî qetil keno. Goristanê Pirsûsî de wexto ke cenazayî defin benê polîsî hêrişê şarî kenê. Emîne Şenyaşar binê ablûqaya polîsan de û bi feryadê 'Domanê mi roje bîyî, vêşan şîyî' dejê xo ana ziwan. Serekkomarê Tirkîya Recep Tayyîp Erdoganî keyeyê Şenyaşarî sey 'terorîst' mojna û keye hedef kerd.

Dayîke Emîne Şenyaşar wina qala ê rojan kena: ''Pirsûs de her kes keyeyê ma şinasneno, keyeyê ma girêdayîyê kulturê xo yo. Haci Esvet merdimêko welatperwer bi û ey tim muhtacan rê ardim kerdêne. Ma no kerdiş qet heq nêkerd. Wextê hêrişanê DAÎŞî de nêzdîyê 57-58 kobanijî keyeyê ma de ca bîyî. Destê ma ra çi ameyo ma seba înan kerd. Reyna Haci Esvet keyeyê ma yê dewe de rojnamegerî ca kerdî û pêro hewcedarîyê înan peyda kerdî.

Roja serebûtî ez şîya dikane. Mi lajê xo Adilî reyde qisey kerdêne, ez vat o zaf qefilîyayo. Dima ez şîya keye lajê mi Celal mi rê telefon kerd. Menga Ramazanî bi. Celalî mi rê werdê 'dolma' waşt. La mi vat erey o, ez do siba bipewja. No zî mi rê bi derd. Çend deqayan ra dima tornê mi ame keye û vat tay kesî dikane de mêrdeyê mi dir nîqaş kenê. Ez kewta rayîr, şîyêne dikane. Cinîyêke ez vindarna vat 'meşo domanê to dikane de dîyayî guleyan ver, ê do to zî bikişê.' Ez lez bi lezî şîya. Rayîr de mi mêrdeyê xo Haci Esvet dî, ma pîya şîyî. Ma resayî dikane. Polîsan destûr nêda ke çew şoro zere. Kes tersê keyeyê Yildizî ra nêeşkayêne birîndaran wedarno nêweşxane. Dima ma eşnawit ke domanê ma wedarîyayî nêweşxane. Ez û mêrdeyê ma ma şîyî nêweşxane. Keyeyê Yildizî dormeyê nêweşxaneyî girewt û pê dar û asinan hêrişê Haci Esvetî kerd.

Keyeyê Yildizî Pirsûs de cerg ê, dizd ê. Senî cergan hêrişê Rojawanî kerd înan zî wina hêrişê ma kerd. Verê çimanê mi de domanê mi qetil kerdî. Înan do Fadil zî qetil bikerdêne la ma o wedarit Amedî.  Fadil hema ke birîndar bi polîsan destbend kerd û erşawit zîndanî. Dima dest nîya dîmenanê kamerayanê nêweşxaneyî. A şewe pêro nêweşxane newe ra ame bpyaxkerdene û delîlê sûcî ameyî reşkerdene. No keye zulmkar o, Pirsûs de her kesî rê zulm keno. Ê xo sey wayîrê Pirsûsî vînenê. Pêro karanê xiraban kenê.

Ez wazenê qetilkarê domananê mi wa bitepişîyê. Ez gandar a la seke ez merda. Heta ke qetilkerî nêrê dîyene ez tîya ra nêwurzena, ez bimira zî tîya de bimira. Eke wazenê wa mi tepişê. Ez semedo ke edalet wazena çend reyan lajê xo Ferîtî reyde destbend bîya. Lajê mi Ferît ame derbkerdene. Wextê destbednkerdişî de ez maruza cigêrayîşê rûtî bîya.

3 canê ma kişîyayî, lajê mi Fadil 3 serrî yo zîndan de yo. Wa lajê mi vera bidîyo. Hînî ma de taqet nêmend. Çira edalet çin o?Çimê mi bermayîşî ra bîyî kor. Çira lajê mi hucreyê yewkesî de tepişîyeno?

No senî sîstem û edaelet o? Çira çew qîrayîşê ma nêeşnaweno? Heta ke edalet bêro caardene ez do çalakîya xo rê dewam bikera. Ez bimira zî tîya ra nêwurzena ra. Kiştoxî teber de yê la lajê mi zîndan de yo. Homa rojêke na dewlete birijno înşallah.''

No qîrayîş û hewarê Emîne Şenyaşare 34 rojî yo verê Edlîyeya Riha de nobete edaletî yo.