Endama Komîteya Merkezî ya PKKyî Xalîde Engîzek programê taybetî yê Radyoyê Dengê Welatî rê rojdem ercna. Qiseykerdişê Engîzeke ra qismêk wina yo:

''Ewro têkoşîno ke merkezê ci Îmrali yo dewam keno. Têkoşîn Îmrali, koyanê Kurdîstanî, tunelan de  û erazî de dewam keno. Çar leteyanê Kurdîstanî û teberê welatî de şarê ma payan ser o. No têkoşîn do ser bikewo. Têkoşînê Îmraliyî semedê ma çimeyê hêzî yo. Ma têkoşînê Rayberîye selam kenê. Xeta PKKyî xeta fedayîtîye ya. PKK cuya ke azad nîya sey cuya merdîye geno dest. PKK manevîyat o. Cuya bêmana qebul nêkeo. Ruhê PKKyî hema Îmrali, Avaşîn û zîndanan de dîyeno ciwîyayene.

Bi kanûnanê taybetan Imrali de tecrîdo giran yeno rayraberdene. No tecrîd çend şino zîndananê bînan ra vila beno. Sîstemê tecrîd û îşkenceyî  yo ke vera xoverdayoxanê zîndanî yeno rayraberdene semedê teslîmgirewtişê înan o. No sîstem Îmraliyî ra heme zîndananê Kurdîstan, Tirkîya û Rojhelatê Mîyanênî vila bi. Sey şerêkê vera şorişî vila beno. No sîtem têna bi destê Tirkîya nêbi. No sîstemê Guantanamo yo. Dewlata tirke têna gardîyanê nê sîstemî ya.

Senî ke dewleta tirke Îmrali de gardîyanîya sîstemî kena, Zap de zî bi nameyê NATOyî şer kena.  Şexsê gerîlayan û Îmraliyî de wazenê hêvîya kurdan bişikinê. Eke îradeyê Îmrali, zîndanan û koyan bişikîyo, heme destkewteyê kurdan yenê çînkerdene. O wext xîyalê dewleta tirke yê osmanîye Rojahilatê Mîyanênî de yenê ca. coka heme şertanê şerî binpay kenê, çekanê qedexeyan şuxulnenê. 50 serrî yo hema înan PKK hole nas nêkerdo la Zap de do dersa peyêne bidîyo dewleta tirke.

Dewleta tirke 2021 de ameye Başûrê, qaçîko hinda Vakur tesfîye kerdbi la hemrayanê ma derbeya xurte daye înan ro. 17ê nîsana 2022yî de hêna hêriş kerd. Narey dîrekt hêrişê nuqtayanê merkezî û stratejîkan kerd. Waştişê înan destfînayîşê nuqtayanê stratejîkan ê Zap, Mîtan û Avaşîn bi. Semedê nê hemkarîya PDKyî zî şuxulnaye. PDKyî pîya bi paştdayîşê dewleta tirke rayîrê gerîlayan zî birnayî. PDKyî xizmetê leşkeranê tirkî kerd û resnayê warê şerî. Di aşmî yo şer dewam keno. Gerîlayî têkoşînê tarîxîyî kenê.Têna xover nêdanî, şinê dişmenî ser û derbanê girdan danê piro. Dewleta tirke bi operasyonê Pençe-Kilitî Zap de ameye kilîtkerdene, hinda ne eşkena aver şiro ne zî peyser agêro.

Gerîlayê YJA Starî nê serkêşîya nê şerî kenê. YJA Star serkêşîya PAJKî de inkey cepheyanê Zap, Avaşîn û Metîna de rayîrêko barîyî ramojeneno. YJA Star şer de performanso serkewte ramojneno. Şerêko serkêşîya YJA Starî de yeno kerdene ra dişmen terseno, coka hende hêriş keno. YJA Star sîstemê camêrd-serdestî yo ke Kurdsîtan de cinîyan rê tecawuz keno, mirneno û erzeno zîndanan, ey ra hesab perseno. Seba ke dewleta tirke nêeşkena YJA Starî hêrsê xo cinîyan ê komelî ra vejena. Mîrasê 1ê Hemleya 1ê Hezîrane ewro milê YJA Starî de yo.

Embaze Zîlane proses raşt fam kerd, Rayberîye raşt fam kerde, tesbîtê raştî kerdî, hedefê xo raşt pênas kerd û sey fermandarêka wayîrê artêşa xo şîye dişmenî ser û ramojna ke ma têna bi ruhê fedayîtîye eşkenê biciwîyê. Coka hemraya Zîlane bîye xeta ma ya cuye. Taktîkê hemraya Zîlane Zap, Avaşîn, Rojawan, Şingal û heme Kurdîstan û zîndanan de yenê rayraberdene. Eke ma sey cinîyan ê kurdan wazenê  welatê xo îşxalî ra bipawê ganî ma xeta Zîlane înşa bikerê. Bi na wesîle ez  şexsê embaza ma Zîlane de heme şehîdanê hezîrane, şehîdanê azadîye bi hurmet yad kena.''