Engura ke qezaya Erdîşî ya Wanî zîl dana, 3 hezar serrî ra cuwa ver asmêra aye hetê Qralê Ûrartû Menûayî ra ameyebî ramitene. Engura Erdîşî emser zî ser dezgehanê rotişî de ya.

Engura ke ver çinbîyayîş de bî, dima ke asmêra aye hetê Şaredarîya Erdîşî ya HDP'yî ra newe ra ameyebî ramitene, reyna bîya çimeyê debarî yê şarê herême. Rîyê peygoşîye û polîtîkayanê dewlete ra engura Erdîşî ver çinebîyayîşî de bî. Teyna taxa Salîhîye ya Erdişî de ameyêne ramitene, la nika her taxe û dewa de esta. Engura Erdîşî Erdîşî de û şaristananê dormeyî de yena rotene.

Engura Erdîşî Nêweşîyan Rê Derman a

Yeno vatene ke engura Erdişî seba nêweşîya şekerî ra heta nêweşîya kanserî sey derman a. Goreyê nuşteyê 3 hezar serrî ke herêma Karataşlar û Erdîşî de yê, engura Erdişî 3 hezar serrî cuwa ver hetê Qralê Ûrartûyan ra ameya ramitene. Nê nuşteyan de Qralê Ûrartû zewtî dayê kesan rê ke engurî talan kerdî. Wina ame nuştene: "Menûa seba Homayo Hadlî na engure ramite. Kamî zerar bidê ci, wa Homayo Haldî, Homayo Teşûûba, Homaya Şevîne û pêro homayî germîya roje de înan bivêşnê."