Serhat Erbey, Hepisxaneyê Tîpê Tyî yê Denîzlîyî de girewte yo û o zî sey xeylî girewteyanê zindanan grevê vêşanîye yê bêdem û bêdore de yo. Waya ey Hêvîdar Erbeye derheqê ey de, ANFyî rê qiseyî kerd. Qaso ke Hevîdare vana 19ê Çile de, bi telefon ey de qisey kerdo.

MA BI ÎNAN SEREBERZ ÎME

Hevîdare va ma paştdarîye danîme xoverdayîşê înan û wina dewam kerd: “Bi kekê mi, girewteyî Lokman Sevîlgen û Ramazan Çekmenî zî kewtê grevê vêşanîye. Wexto ke ma şîme pêvînayîş, ma dî ke moral û motîvasyonê înan baş o, huyayişê înan nêbirîyaybî. Ma bi înan sereberz îme. Çunke ê çalakwanê dewaya xo ya heqe yê. Tecrîd sûc o û ganî qet kesî rê nêro kerdene. Tecrîdkerdişê Rayber Ocalanî, tecrîdkerdişê pêroyê Kurdan o.  Ez wazena tecrîd bêro wedaritene û weşîya çalakwananê grevê vêşanîye hîna xirab nêbo.“

MA HURMET MUSNENÎME ÎRADEYÊ ÎNAN          

Erbeye nîşan da û va waştişê grevê vêşanîye waştişê înan a û va “xoverdayişê kekê mi, seba ma zaf bimana ya. Her çiqas ke na çalakîya ey û ê hevalanê ey ma bitersno û bikero qisawetin zî, ma hurmet musnenîme îradeyê înan. Ez  heman çîyan seba Leyla Guvene zî vana.“

Erbeye peynîya qiseykerdişê xo de va heta ke tecrîd nêdarîyo we, ê do paştdarîye bidê xoverdayîşan û wina dewam kerd: “Ma do rayîrê xo ra anêgêrê. Ganî pêroyê Kurdan paştdarîye bido na çalakîye. Çunke ma heqdar îme û ma do ser bikewê.“