Endama Koordînasyonê KJKyî Besê Erzîncan ANFyî babetê muhîmî yê rojdemî ercnayî.

Erzîncane bale antê tecrîdê Îmraliyî ser û vat: ''Rayberîya ma bi serran o binê tecrîdê giranî de yeno tepiştene. Vera naye bêmabên têkoşîn yeno kerdene. Tewr peynî de reyna cezaya 6 mengan ameye dayene. Pê tecrîdî kenê ke têgêrayîşê ma zehîf bikerê. La ma xo ra perspektîfê azadîye yê Rayberîye rewna girwtî û se beno wa bibo ma do nînan bîyarê caardene. Zîndanan de bi hezaran hemrayî têkoşîn kenê. Ma nê têkoşînî selam kenê. Xeta Mazlûm Dogan û Kemal Pîrî zîndanan de yena temsîlkerdene. Tekoşîno tewr pîl zî hemrayê ma Zap û Avaşîn de danê. Zap de têkoşîno tewr biheybet ê tarîxê kurdan yeno rayraberdene ke dişmen herra kurdan ra bêro eştene. Şer bi heme şîdetê xo dewam keno. PKK seba ke sîstemêkê alternatîfî temsîl keno hedefê hêzanê hegemonîkan de yo.

Dewleta tirke serrgêra ronaşîyîşê xo ya 100. de  wazena kurdan qir bikero û şaranê herême bigêro binê kontrolê xo. Semedê estbîyayîşê dewleta xo wazenê kurdan tesfîye bikerê. Coka sere de Îmrali, vera gerîla, hêzanê demokrasî û azadîye planê hêrişan kenê.  Ma demêkê zaf stratjîk de yê. Dewleta faşîste çîyo ke par pê operasyonan nêeşka bifîno dest wazena emser bifîno dest.  Emser dahîna zaf, teknîk, îstîxbarat, hetkarîya teberî û paştîdayîşê PDKyî est o. Vera gerîlayan gazê qedexeyî yenê şuxulnayene la dinya vera nê bêveng a. Çunke hêzê hegemonîkî hetê nê şerê neheqî yê. Xora sebebê parçekerdişê Kurdîstanî zî nê hêz ê. No têkoşîno tewr pîlo ke ma vera dewleta tirke kenê. Zap û Avaşîn de hemrayê ma mîyanê têkoşînê xurtî de yê. Ganî şarê ma û hêzê azadîye û demokrasîyî zî dormeyê gerîlayanê kurdan de têkoşînî xurt bikerê.

PDK her roje dahîna zaf îxanet keno. Têna vera kurdan nê vera şaranê herême, bawrîyan û azadîya cinîyan o. Statuyê kurdan xeymê keyeyê Barzanîyî de nîyo. Herre, azadîye û destkewteyanê  kurdan semedê menfeatê xo qurban keno. Keyeyê Barzanîyî zano ke Behdînan de zaf eşîrî vera înan ê. Coka Behdînan û Xakurkê rewna çîmî ra vetî, dayî dewleta tirke. Eşîrê ke înan qebul nêkenê wazenê pê destê dewleta tirke terbîye bikerê. PDK semedê îqtîdarê xo her hetî ra paştî dano AKPyî. Xora semedê şarê kurdî yew qiymetê PDKyî nêmendo. Coka terseno. Ewro Duhok û Zaxo pê tehdît û şantajî zor bi hêzanê xo payra yo. Dewleta tirke wazena heme Başûrê Kurdîstanî îşxal bikero.  Pê Pêkerdişê 9ê Teşrîna Verêne yo ke hetê PDK, Iraq û Amerîka ra ame kerdene, yeno waştene ke îradeyê şarê Şingalî bêro şiktene. Tewr peynî de eşkerayîya Mesrur Barzanîyî zî heqîqetê PDKyî vet werte. Ganî şarê ma yê Başûrî vera xeta îxanetî tewirê xo eşkera ramojnê.

Leyla Qasim 12ê gulana 1974 de Bexdad de Şîrîne Elemhulî zî 4ê gulana 2010 de hetê rejîmê Îranî ra ameyî daliqnayene. Bi wesîleya serrgêra şehadetê nê wird cinîyan ê kurdan de ez înan bi hurmet yad kena. Cinîyê kurdan tim herre, ziwan û kulturê xo pawenê. Gerîlayê YJA Starî ewro Zap û Avaşîn de xeta Şîrîne Elemhulî esas genê. Tarîxê ma yê têkoşînê cinîyan Sakîne Cansizan ra nata çem herikyeno aver şino. YPJ zî şorişê Rojawanî de rolê xo kay kerd. Cinîyê kurdan têkoşînê cinîyan ê dinya rê serkêşîye kenê. Ewro xeta cinîya azade ya ke hetê Rayber Apoyî ra ameye aberdene Kurdîstan, Rojhilatê Mîyanênî û dinya de hetê cinîyan ra yena qebulkerdene.

Sîstemo serdest wazeno bi hişmendîya azadîya sexteye cinîyan û komelî bibedilno. Kenê ke cinîyan bikerê koleyê camêrdan. Cinîyî hinî qetî koletîye qebul nêkenê. Nika têkoşînê ma têna protesto û redkerdiş nîyo, ganî ma cuya  azade înşa bikerê.Cinîya ke îxanetê şar û cinsê xo kena, qedîyaya, cinîyan kole temsîl kena. Ruhê wextî têkoşîn o. Têkoşîn keno azad. Ganî bi  her kes bi nê zanayîşî bibo tewrê sefanê têkoşînî. Têkoşînê ma yo rêxistinkerde eşkeno Rayberîya ma zî azad bikero.

Hemra Aysele Dogan temsîlkaranê serkêşan ê xeta Apoyî ya Dêrsimî bî. Heme emrê xo têkoşînê semedê kurdan, elewîyan û cinîyan de ravêrna. Hemraya ma Aysele Dogan sey kiriştoxe û temsîlkarêka tradîsyonê têkoşînî yê Besê, Zarîfe û Sakîne Cansizan bîye sembelanê Têkoşînê Azadîye yê Cinîyan û tarîxê azadîye ma ra yew ke do çirey nêro vîrakerdene.''