Endama Komîteya Merkezî ya PKKyî Hêlîne Umît beşdara Medya Haber TVyî bîye û nêzdîbîyayîşê CPTyî yê serê Îmraliyî ercna.

Qiseykerdişê Hêlîne Umît ra tay noqtayê girîngî wina yê:

''Famkerdişê sîstemê Îmraliyî seba famkerdişê sîstemê dinya girîng o. Mîyanê 15-20 rojanê verênan de derheqê Îmraliyî de nîqaşî kewtî rojdem. Hem CPTyî eşkerayîye daye hem zî Wezîrîya Edaletî goreyê na eşkerayîye eşkerayîyêka bîne daye. Ma tim vanê ke Îmrali de polîtîkayê qirkerdişê vera kurdan yenê plankerdene û caardene. Nê planî hetê hêzanê komplogeran ra yenê caardene. Xora seke ma vatbi dewleta tirke teyna gardîyanîya sîstemî kena.

Komîteya Vergirewtişê Îşkenceyî (CPT) û Mehkemeya Heqanê Merdiman a Ewropa (MHME) seke Rayber Apoyî verê cû tesbît kerdbî mîyanê hêzanê tecrîdî de cagênê. Sey şarê têkoşêrî a raşte nê hêzan ra yew pawitişê ma çin o. Ewropa ra pawitişê ma yê demokrasîyî çin o. Ma zanenê ke nê hêzî sîstemê tecrîdî kontrol kenê. Eşkerayîyê CPT û MHME yê serê Îmraliyî seke îtîraf ê. Hinî nê hêzî sûcî erzenê milê yewbînan. 

CPT zî MHME zî seba nimnayîşê sûcanê Ewropa ronîyayê. Nê dezgehî bi tewir û têgêrayîşê xo sîstemê Îmraliyî meşrû kenê. CPT xora sîstemê Îmraliyî seke meşrû yo vîneno. Nika reya verêne nê dezgehî bi nê hawayî sûcê xo qebul kenê.

Şarê kurdî şewe û roje seba ke rewşa Îmraliyî bêra eşkerakerdene çalakîyan de yo, Ewropa de nobete de yo. Şarê Ewropa, hêzê demokrasîyî ganî na raştîye bivînê û têkoşînî berzêr bikerê. Çunke Îmrali milê pêro merdimatîye de şerm o. 

Eke CPT ewro MHME sûcdar keno no tesîrê xoverdayîşê bêmabênî û qerardarî yê kurdan û dostanê ma ra yo. Têkoşîn naye ra pey hanî hîna bêro xurtkerdene.''