Parlamenter û berpirsîyaranê HDP’yî derheqê  hêrişê polîsan ê vizêrî yê banê HDP’yî yê Amedî de eşkerayîyêk daye. Bi nameyê heyetî parlamenterê bajarî Mûsa Farîsogullari qisey kerd û vat ke polîsan bi waştişê qetilkerdişê çalakwanan hêriş kerd.

SEMEDÊ QETILKERDIŞÊ ÇALAKWANAN HÊRIŞ KERD

Farîsogullari bale ante polîtîkaya hêrişkare ya dewlete ser û va: ‘‘Seba ke tecrîdê serê Birêz Ocalanî bêro wedartene, Leyla Guvene 122 rojî yo grevê vêşanîye de ya. Reyna zîndan, Kurdistan û Ewropa de grevî çend şino vila benî. Ma zî seba ke waştişê xoverdayoxanê grevê vêşanîye bêro ca dest bi grevê vêşanîye kerd. Çalakîya ma seke dest pêkerd ci rê hêrişê polîsan esto. Binşewe banê partîya ma hetê hêzanê dewlete ra reyna gêrîya binê ablûka û dima ra zî bêr û pencereyê ma şikitî kewtî zere.

WAZENÊ KE KURDAN QIR BIKERÊ

Heqê şima çîno şima wina bierzê partîya ma ser. Na bêhûqîye ya û nêna qebûlkerdene. Tayî mend ma linc bikerê. Ez eşkera vana, ameyîbî ke ma qetil bikerê. Ganî heme rayepêroyî ya dinya naye bizano. Ma qirkerdişêk rê rî bi rî yê. Tayî ma welatê ma ra fetilnenê, o bîn vano mi talîmat dayo merg zî serbest o. Dewleta winayên nêbena. Qikerdişê şarê Kurdî ra çew çîyêk dest nêfîneno.

ŞARÊ MA WA VERA  HÊRIŞAN WIRZÊ LINGAN SER

Ma tîya ra veng bi şarê xo kenê. Şarê ma genî vera polîtîkaya qirkerdişî, zext û zordarîyê vengê xo berz bikero û paşt bido temsîlkaranê xo. Kam ça de beno wa bibo  ganî herkes reaksîyonê xo yê demokratîk ramojno. Wextê vernî girewtişê nê zulmî ame. Ma do pîya vernî zulmî bîgêrê. Yewna çareyê ma çîn o. Ma do bi yewbîyayîş û xoverdayîş ser bikewê.‘‘