Rojnameger Ferda Çetînî ard ziwan ke bi mudaxeleyê Rayber Apoyî argumanê ‘terorî’ yê vera kurdan pûç bîyo û vat ke eke proses aver şoro rantgîrê şerî do tasfîye bibê nêbo şer do newe ra giran bibo.
Rojnameger Ferda Çetinî derheqê prosesê neweyî de ANFyî rê qisey kerd.
Çetinî dîyar kerd ke PKK 50 serrî yo bi têkoşînê gerîlayan keno û bi nê hawayî polîtîkayanê qirkerdiş, çinkerdiş, asîmîlasyonî ûsn. şikneno. Çetînî vat: ‘’La bi têkoşînê çekdarî nê polîtîkayî nêqedîyayî zî. Qedînayîşê têkoşînê çekdarî do verê têkoşînê huqûq û sîyasetî abikero. Şer bi xo ciwanirêk o ke çimeyanê ekonomî çin keno.
Metnê vengdayîşî yê Rayber Apoyî metnê bazarîye nîyo. No metn seba prosesî amadekerdiş o. La ganî seba ke no proses aver şoro ganî dewlete zî gaman bierza. Dîyar o ke hukmat û dewlete wazenê ke rewşa nikayêne dewam bikera. Komelê kurdan ganî ney qebul nêkero. Ganî tecrîd biqedo û Rayber Apo azad bibo ke rolê xo bi aktîfî kay bikero.
Seba ke haştîye û demokrasîyo raştikên bêrê caardene ganî mezgê şîdetî û şerî tasfîye bibê. Gerîlayî vanê ke ‘Ma do şerî biqedînê.’ Nê halî de dewlete gêrena dişmenêkê bînî. No dişmen zî Rojawan o. Dewlete bi çimê terorîzmî ewnîyena kurdan ra. No şerêko taybet o.
Dewlete vana ke Rojawan de PKK est o, selahîyetdarê PKKyî est ê û coka Rojawan seba înan gef o. Eke proses aver şoro û PKK têkoşînê çekdarî ra fek vera bido, no arguman bi hawayêkê otomatîkî do bin bikewo. Dewlete zî bi xo zanena ke Rojawan de PKK çin o.
Coka no argumanê Tirkîya cayê bawerîye nîyo. Eleqeyê eşkerayîya Serok Apoyî ya bi Sûrîye û bi kurdanê Rojawanî çin o.
Dewletê Ewropa sere de Almanya û Swêd PKKyî krîmînalîze kenê. Nê seba têkoşînê ci yê çekdarî ra ney kenê. Serek Ocalanî no arguman zî destê nînan ra girewt. Vengdayîşê ey tena seba Tirkîya ney seba Ewropa zî bi.’’
