Fermandaranê Hemleya Şorişgêre ya Bazanê Zagrosî ra Sîyabend Dalahoyî  hêrişê îşxalî yê dewleta tirke û îxanetê PDKyî ANFyî rê ercnayî.

Qiseykerdişê Dalahoyî ra beşêk wina yo:

''Seke zanîyeno 17ê nîsan de dewlete operasyonêk da destpêkerdene. Nê şerî de artêşa tirke NATOyî ra paştî gêna, hêzê ma zî hêzê şarê xo û xeta pawitişê şarî ra paştî gênê. Zap de şer tim rojdemê ma de bi. Bi taybetî 2017 de şer xorinêr bibi. Ma zanayêne ke dişmen nê hêrişan do bikero. Coka ma ercnayîş û amadekarîyê xo kerdbî. A raşte operasyonî 14ê nîsane de dest pêkerd. Bi 50 teyarayanê şerî Avaşîn û Zap dîyabî bombayan ver. Dişmenî verî waşt operasyonî bi nimitkî bikero.

17ê nîsane ra verî ma hêzê xo ca kerdî. Seba ke pêro girî destê ma de bîyî Skorskyî nêeşkayî leşkeran bîyarê war. Embazanê ma vera dayêne înan ro. Seba ke ê nêeşkayêne teknîkê destê xo bişuxilnê teyarayê şerî vistî dewre. Herêmanê binê kontrolê PDKyî ra leşkerê tirkî kewtî herêma Kuro Jahroyî. Tîmanê ma da leşkeran ro. Dişmen hema zî cayê xo de yo. Dişmen nika wazeno xo nêzdîyê tunelanê şerî bikero. A raşte xeylêk cayan de embazê ma hêrişê dişmenî kenê. Dişmenî medyaya xo de vato 'Safhaya yewine temam bîya.' La no raşt nîyo.

Nika serê xeta Ertûş û xeta Kurojahroyî de tim pêkewtişî qewimîyenê û zafê înan zî serkêşîya embazanê ma de yenê kerdene. Dişmenî nika xo nêzdîyê tay tunelanê şerî û giran kerdo. La qet yew tunel zî nêkewt destê dişmenî. Seke Qerargehê MPŞyî pare kerdbi şerê tunelan û erdî hem raştbîyayîşê xo îsbat kerdo, hem zî pratîk de ser kewto. No şer şerêko asan nîyo. Têkoşînêko çetin dewam keno. Dişmen îşxalî de israr keno. Dişmenî pêro hêzê xo seferber kerdî.

Nê 11 rojan de embazanê ma vera teknîkê dişmenî şer kerd. Embazanê ma xo ver da û tunelê şerî pawitî. Mîsal çend roj verî embazê ma herêma Koyê Reşî de şîyî 7 cenazayanê dişmenî ser. Reyna Kuro Jahroyî de embazanê ma da leşkeran ro. Embazê ma zî şehîd bîyî la peynî de ma do serfîrazîye bivînê. Ma do qetî apey gamêke nêerzê û vera dişmenî çi hewce bikero ma do bikerê. Ma hêzê xo Rayberîye, embazanê xo, şehîdanê xo û şarê xo ra gênê.

PDK parçeyêkê nê şerî yo. Na babete de tewirê ma zelal o. Ma bi her hawayî fedakarîyan kenê la wa bizanîyo ke vera PDKyî hînî tehamulê ma nêmendo. Wexto ke ma şer kenê, ê senî eşkenê ney têna seyr bikerê?

Ma hêzê xo şarê xo ra gênê. Ganî şarê ma hîna bi xurtî tewrê têkoşînî bibo. Cinî û ciwanî zî ganî çalakîyanê hîna xurtan bikerê û cewabê hewcedarî bidê dişmenî. Ganî ciwanê kurdî çeke bigêrê xo destî û refanê gerîlayan de ca bigêrê.''