Fermandaranê HPGyî ra Rizgar Ersîyî ke roja 9ine ya operasyonê vera Heftanînî de Radyoya Dengê Welatî rê qisey kerd vat dewleta tirke rixmê heme îmkananê xo Heftanîn de vera xoverdayîşê gerîlayan do bin bikewo.

Ersîyî vist vîrî ke di serrî yo no operasyonê îşxalî yeno plankerdene û vat: ''Xiret kenê ke warê hende 30-40 kîlometreyan bîfînê destê ke heta Qendîl û Şingal îşxalê xo hîra bikerê. Eke wina bikerê Zaxo ra heta Silemanî têna sey xetêka barî warê deşte maneno. Xora hêrişê vera Mexmûr, Şingal û Herêmanê Pawitişî yê Medya destpêkê nê demî bî.''

Îşxalkerî  gerîlayan ra derbeyanê giranan wenê

Fermandar Ersîyî bale ante xoverdayîşê gerîlayan ser qiseykerdişê xo rê wian dewam kerd:  ''Koyanê bimbarekan ê Heftanîn de şero giran qewimîyeno. Gerîlayê Kurdîstanî bi hawayêkê qehremankî xover danê û têdima derbanê giranan danê dişmenî ro. Îşxalkerî verî herêmê bi teyarayanê şerî bombarduman kenê.  Dima ra bi pirodayîşê helîkopteranê kobrayan û kişfê teyareyan operasyon danê destpêkerdene. Rixmê naye hela ke payê  xo erdî de ronanê hetê gerîlayan ra yênê pirodayene û mecbûr manenê ke peyser agêrê. Raştîya Heftanînî naya. 9 rojan de 5-6 qilî bi bombardumanan fînayî dest.

Heftanîn de xoverdayîşo tarîxî yeno dayene

Gerîla 8 rojan de 20 çalakîyî kerdî û da 15 helîkopteranê kobrayan ro. Zafê înan ameyî derbkerdene ke mecbur mendî agêrê. Bi desan çalakîyê sabotajî ameyê kerdene.  Tewr tay 70 leşkerê tirkan ameyî kiştene û bidesan birîndar bîyî. Panc embazê ma  bi xoverdayîşê fedaîyî tewrê artêşa bêmergan bîyî. Gerîlayî  her cayê Kurdîstanî de yê û vera dişmenê şarê ma şer kenê. Ma gerîlayî senî ke ê vanê cayê ma yo sabît çîn o. Her vîncewa herra Kurdîstanî cayê ma ya. Ewro ma tîya yê siba yewna ca de yê. Ma gerîlayê profesyonel ê û goreyê taktîkanê dewrê neweyî têgêrenê. Ma do çirey destûr nêdo dişmenî ke herra ma îşxal bikero.''

Serkewtiş bi yewbîyayîş û xurtkerdişê têkoşînî beno

Ersîyî vat: ''Êyê ke raştîya dişmenî vînenî û wayîrê vîdanî yê ganî dormeyê yewîya kurdan de bêrê têhet û paştî bidê hêzanê HPGyî. Eke wina mebo do Helebî ra heta Kerkûkî planê îşxalî ser bikewê û şarê ma raştê qirkerdişî bêro. Qetilkarê şarê ma çirey dost nêbênê. Şarê Başûrî yo ke şarêko  qehreman û şerwan o ganî plananê tirkan raşt fam bikero vera ci tewirê xo ramojno. Ganî refarandûmê 2017î nêro vîrakerdene ke verî dewleta Erdoganî vera xoserîya kurdan vejîya û tehdît kerd. Nika ê çend xo sey dostê PDK û Başûrî ramojnê zî  no heta zehîfkerdişê PKKyî dewam keno. Ewro Başûr bi endamanê MÎTî bîyo pirr û her rojê bi destê înan şaro sivîl yeno qetilkerdene. Ganî hemkarê dewleta tirke mîyanê komelî de nêrê qebûlkerdene. Şarê ma hînî bîyo hîşyar û tewiro bianor erjaye ramojeno. Sere de şarê Şêladizê şarê ma yo ke vera îşxalkeran serewerito ma ey selam kenê û fîraz kenê.''

Wa şarê Başûrî vera îşxalkeran û hemkaranê înan hîşyar bo

Fermandar Ersîyî  qiseykerdişê xo bi nê vatişan qedîna: ''Têkoşînê azadîye yê gerîlayanê HPG û YJA Starî do vera faşîzmî dewam bikero. Şarê ma wa naye ra bawer bikero û gerîlayan ra paştê ci pêt bo. Ewro Xakurkê ra heta Hefatnîn û Vakurê Kurdîstanî de şer qewimîyeno. Çalakîyê ciwanê ma zî demê peyênî de zêdîyayî ke eşkenê biancê merhaleyêka core. Gerek her kes vera rejîmê faşîstî çalakîye bikero. Dewleta tirke nêeşkena nê şerî ra vejîyo ke do peynîya xo bi destê xo bîyaro. Bi xurkerdişê xoverdayîşî ma do ser bikewê û beyraqa azadîye heme koyanê Kurdîstanî de têşanê.''