Fermandaranê Qerargehê Merkezî yê HPGyî Hakî Armancî hêrişê îşxalî yê dewleta tirke, xoverdayîşê gerîlayan û îdîaya 'gerîlayan hêrişê pêşmergeyan kerdo' ANFyî rê ercnayî. Qiseykerdişê Armancî ra beşêk wina yo:

''Hêrişanê vera Zap, Metîna û Avaşînî de 44 rojan de dewleta tirke zaf teng bîye. Dewleta tirke waştêne îşxalê xo temam bikera ka gerîlayan na asteng kerde û derbê giranî dayî dişmenî ro. Dişmen her roje vînîbîyayîşan dano û nêeşkeno aver şoro. Vera îşxalkeran destê ma ra çita bêro ma do bikerê. Hêzê ma qerardar û amade yê. Armancê ma têna averşîyayîşê dişmenî vindarnayîş nîyo. Ma do cayanê îşxalkerdeyan zî apey bigêro.

5ê hezîrane de serebûtêko dejin qewimîya. Ez keyeyanê pêşmergeyanê ke wefat kerdê ra serweşîye wazena, birîndaran ra şîfaya xeyrîne wazena. A roje konvoyê bi 50 wesayîtan ame cayanê ke tede 25 serrî yo gerîlayî estê. Êyê ke no sewqîyat plan kerd, fermanê ci dayo mesuldarê raştikênî yê nê serebûtî yê. Nê hêzî wayîrê çekan ê giranan, kepçeyan bîyî. Aseno ke nê hêzî seba viraştişê rayîran, seba girewtişê cayanê embazan ameybî. Eke verî ra xebere bidîyêne ma, ma nîqaş bikerdêne serebûto winasên nêqewimîyayêne.

Înan zanayêne ke embazê ma uca de mîyanê çeperan de yê, dewleta tirke hêrişan kena. Agahîyî ameyêne ke dewleta tirke Metîna de wazena aver şora. Nê atmosferî de sewqîyato winasên xeletîyêka pîl a, bêmesuldarîyêka pîl a. Wa şarê ma bizano kamê ke nê sewqî erşawitî mesuldarê nê serebûtî yê.

Paştîya ma ewnîyena pêşmerge û şarê Başûrê Kurdîstanî, rîyê ma ewnîyeno dewleta tirke. Eke cayanê embazan rê sewqîyato winasên yeno kerdene no dişmenî rê xizmet keno. Zanîyeno ke no konvoy şîyêne kamca. Embazê ma 25 serrî yo uca de yê. Ê rayîrê konvoyî cara hetê sivîlan ra nêşuxilîyenê. Ê pê kepçeyan ameyî û hetê embazanê ma de vindertî. Embazan vat 'Ma şîyar kerd ke wa aver nêrê ma tîya de yê. La ê reyna aver ameyî coka no serebût qewimîya.'

Ma nêzanenê pêşmergeyan senî dinyaya xo bedilnaye. Tay eşkerayîyî vanê dewleta tirke ê kiştê. Wextê serebûtî de herême ser o tay teyarayê keşfî estbîyî. Ma zî nê serebûtî cigêrenê. Ganî hînî serebûtêko winasên nêqewimîyo. Têna dewleta tirke pê nê serebûtî şa bîye.

Wa şarê Başûrî bizano ke rojdemê ma nîyo ke ma vera pêşmergeyan çalakîye bikerê yan zî çeke bixebitnê. Eqsê ci fermandaranê ma venga pêşmergeyan da ke wa hetê gerîlayan de vera dewleta tirke şer bikerê. Îdîayê ke vanê gerîlayan hêrişê pêşmergeyan kerdo yan zî pêşmergeyan ra dafike naya ro raşt nîyê zûr ê. Mesûldarê nê serebûtî selahîyetdarê PDKyî yê, fermandarê ê konvoyî yê. Çira wextê hêriş û pêkewtişan de Zendûra rê hezêko winasên erşawîyeno?

de Zendûra rê hezêko winasên erşawîyeno?

Na xeletîyêka pîl a û wa na xeletîye bêra raştkerdene. Ganî hêzê ke erşawîyayê uca wa apey bêrê girewtene.

Nika rewşe asan a la hesas a. Ez reyna vana ke tek armancê ma qedînayîşê îşxalê dewleta tirke yo. Sewbîna yew fikrê ma çin o.

Metîna ra heta Begova û Kanî Masî tay noqtayî ronîyayî. PDKyî rayîran de, kişta rayîran de hêzê xo ca kerdî, hêzê ma asteng kerdî. Nika xora operasyon esto, înan zî rayîrî girewtî. Rixmê hende astengîyan embazanê ma seba ke pêkewtiş nêqewimîyo hîşyarîye kerde ke wa hêzê kurdî nêdê pê. Heta nika çîyo winasên nêbi. La nika ê hê noqtayanê embazanê ma de yê. Na rewşe zaf dejdaye ya. Nika rewşe asan a. Ma hêvî kenê ke PDK do bivîno na xeletî ya û tedbîran bigêro.

2 rojanê peyênan de tim perrayîşê keşfî yenê kerdene, teyarayanê şerî da tay cayan ro. Hetêkî ra PDKyî cayanê embazan de noqtayê xo ronayî, hetêkî ra teyarayê keşfî embazan ser o gêrenê û hetêkê bînî ra zî teyarayê şerî hêriş kenê. Eke PDK qala kurdayetîye keno herinda ke pê çekanê giranan vera gerîlayan şino wa pê dîyalogan bêro ma. Gerîlayî xora do xo bipawê, cayanê xo bipawê.  ma nê cayan ra do fek vera nêdê.Eke PDK ver bi cayanê gerîlayan aver bêro pêkewtiş do biqewimîyo. Ma ney nêwazenê, ma wazenê yewîya neteweyîye bêra ronayene. Serebûtê vizêrînî de 5 pêşmergeyî şîyî rehme. Têna dişmenê kurdan pê şay bîyî. Ma çira dişmen şay bikerê?

Ma xoverdayîşê şarê Silêmanî selam kenê. Înan tewirêko rûmetên mojna. Ma şarê Dihok û Hewlêrî ra zî ney pawenê. Bi taybetî şarê Amedîyê ra pawenê. Eke Amedîyê verê ê pêşmergeyan bigirewtêne no serebût nêqewimîyayêne.

Ma sey HPGyî vanê ke semedo ke mabênê gerîlayan û pêşmergeyan de alozîyêke nêba ma do xîret bikerê. Ma şarê xo û PDKyî ra rîca kenê ke wa pê kayanê dişmenî mexapîyê.

Dewleta tirke semedo ke pêro Başûr îşxal bikera nê kayan virazena. Xora dewlete bi hawayêkê eşkerayî ney ana ziwan. Gerîlayî vera ney xo ver danê, her roje şehîdan danê. Embazî bê hewn, nan, awe manenê. La moralê înan berz o. Tim hê verê çeperan de yê, mîyanê şerî de yê. Sere de PDK wa pêro ciwan û hêzê ma pê gerîlayan sereberz bibê. Ma hêvî kenê ke no do bêro dîyene, naye ra pey serebûtêko winasên do nêqewimîyo û pêro terefî mesuldarîyanê xo do bîyarê ca.''