Artêşa tirke ya îşxalkere nê hîrê menganê peyênan de hêrişê xo yê îşxalî yê vera Başûrî bi destekê PDKyî zêdînayî. Fermandaranê HPGyî ra Piling Zerduştî Yeni Ozgur Politika rê derheqê babete de qisey kerd.

Fermandar Zerduştî ard ziwan ke dewleta tirke destpêkî ra nata armanc kena ke temamîya Kurdîstanî îşxal bikera û nê polîtîkayanê îşxalî de hêzê mîyanneteweyîyî paştî danê dewleta tirke.

Fermandar Zerduştî bale ante ser ke PDK hêrişanê îşxalî meşrû keno û vat: ''Dewleta tirke bi destekê PDKyî Başûr de plananê xo yê gemarinan ana ca. PDK zî tewrê îşxalê dewleta tirke bîyo. PDK û dewleta tirke seba asayîşê herême tehluke yê coka ganî vera nînan têkoşînêko hîna bitesîr bêro kerdene.

Dewleta tirke şaristananê sey Amedîyê û Bamernê de kontrolê nasnameyan kena, Behdînan de wezîfedaranê xo mîyanê dezgehan de cakena. Qiseyê Tirkîya yê 'Ez teyna vera PKKyî şer kena' zûr o. Pêro hereme hedefê dewlete de ya. Ganî şarê ma yê Başûrî na raştîye hol bivîno. Eke prosesê verê ma de komê cîhadîstî Başûr de bêrê cakerdene wa şarê ma nêvajo 'çira wina bîyo?' Nimûneya Rojawanî werte de ya. Hêrişê îşxalî do bibê peynîya şarê Başûrî. Ganî şarê Başûrî vera nê hêrişan têkoşînê xo pîlêr bikero.''

Fermandar Zerduştî bale ante Hêzanê Pawitişê Sînorî ser û vat: ''Dewleta tirke û hêzê ci yê mitefîqî tedaya Iraqî kenê. Hêzê Iraqî warê şerî de est bê zî çin bê çîyêk ferq nêkeno. Çunke ê goreyê mîsyonê xo nêameyê cakerdene. Dewleta tirke erdê Iraqî de operasyonêkî ra zêdeyêr kena. PDK xora bi her hawayî hemkarîya dewlete tirke keno. PDK tim verê ma de sey dişmenî têgêra. La Başûr de verê cû zî nika zî şar û zafê pêşmergeyî qayîl nîyê ke bibê dişmenê ma.

PDK bi cerganê xo yê Roje hêrişê gerîlayan keno. PKK û Rayber Apo seba ke PDK na xeta îxanetî ra fek vera bidê zaf xebitîyayî. Heta Rayber Apoyî Mesûd Barzanîyî sey hemserekê Kongreya Neteweya Demokratîke pêşnîyaz kerdbî. La PDKyî û keyeyê Barzanîyan holîyê şarî ney holî û menfaetê xo weçînayî. PDK bi taybetî keyeyê Barzanîyan seba ke şarê ma rîyê nînan ra vinî kerdo do hesab bidê. Guneyê înan zaf ê û şarê ma hinî mecbur nîyo ke bara înan bikirişo.

Şarê ma her ca de vera îşxalî payan ser de yo. Nê prosesî de ganî têkoşîn xurtêr bibo û çalakîyî bizêdîyê. Bi taybetî Ewropa de çalakîyê seba azadîya Rayber Apoyî zaf girîng ê. Ganî şarê ma yê Ewropa bi xebatanê xo yê dîplomasî û çalakîyan dewleta tirke teşhîr bikero. Ma zî sey gerîlayan do tim erkanê xo bîyarê ca. ''