A roje bi hezaran kesan Koyê Şingalî ra bext waştbi. 3ê tebaxa 2014î de cerganê DAÎŞî hêrişê êzidîyan kerdbî. Komêka bi 6 gerîlayan seba ke şarê êzidîyan bipawa, vera pêro barbarîya cergan sîper bîye.

Destê DAÎŞî de xeylêk çekî est bîyî. La destê şeş gerîlayan de têna doçkayêke est bîye ke a zî PDKyî wexto ke remabi peyê xo de verdabî.

Koma ke fermandarîya ci Memo Mêrdînî kerdêne dest na doçka ser û temamîya roje vera cergan xo ver da.

Fermandarê HPGyî Memo Mêrdîno ke Cûdî de 2017 de şehîd bibi Koyê Şingalî vera cerganê DAÎŞî pê tîmêke pawitbi. Fermandar Mêrdînî şehadetê xo ra verî qala ê rojan kerdbî:

''Fermanî rew dest pêkerdbi. Destê ma de têna tay keleşî, çekê BKCyî est bîyî. 3ê tebaxe de ma xo resna Qizilkent. Ma 4 tenî bîyî. Embazanê ke Qizilkent de bîyî, vat ke uca de doçkayêke est a, PKKyî verdaya. Ma vat 'dest ser nê, ma hê yenê.' Ma wina şîyî Lufa. Nê pêro 3ê tebaxe de bîyî.  Embazan waştêne ma Rabosî bipawê. La xebera ma pê çin bîye ke Şingal û Rambosî ameyê îşxalkerdene. Ma vatêne Rambosî de şarî rêxistin kenê, çekanê ke pêşmergeyan ra mendê gênê û resnenê embazan. Dima embazan vat ke ê hê ver bi ma yenê. Embazî kewtî Sinûnî. O çax embazan vat ke Şingal kewto destê DAÎŞî. Ma Qizilkent de dî ke wesayîtê cergan hê serê kuçeyê Şingalî ra şinê yenê. Ma neçare mendê ke abigêrê Lufa bigêrê.

Embazan ma rê vat ke 'Koyê Şingalî pê şarî pirr o, DAÎŞ wazena xeta Lufa ra aver şoro.' 3-4 embazanê ke ma perwerde kerdbî binê Lufa de dabî DAÎŞî ro. DAÎŞî lezî nêkerdêne, xo nimitêne. O çax propagandaya 'Koyê Şingalî de 1000 hezar gerîlayî est ê' est bîye. DAÎŞ beno ke aye ra xo dûrî girewtêne. A raşte PDKyî seba ke ma teng bikero wina propaganda kerdêne la DAÎŞ tersabi. Roja çarine û hîrêyîne de zî DAÎŞî xo nata koyî nêkerd.

Wexto ke ma şîyî leweyê Lufa ma dî uca de doçka est a. Kasim Dirboyî vat ke înan doçka arda. Ma doçka ver bi dekewtişê cergan eyar kerd. Ma zî kişta doçka de bîyî, ca da şarî. Şar de çekî est bîyî. A roje pê telefonî ma 700 kesî koy de mewzî kerdî. Komêka başe bîye. Ma xeta koyî de artêşe awan kerde.''