Merkezê Îrtîbatî û Çapemenîye yê HPGyî da zanayene ke hîrê gerîlayî şehîd bîyî nê zanayîşî bare kerdî:

''Şerê Şarî yê Şorişgêrî yê 2017 de qehremanîye bêhempayî qewimîyayî. Sere de Botan Vakurê Kurdîstanî de têkoşîno destankî ame dayene. Nê cayan ra yew zî Cûdî bi. Cûdî de serkêşîya fermandarê herême hemrayê ma Memoyî de çalakîyê destankî ameyî kerdene, derbeyê pîlî dîyayî dişmenî ro û hêrişê dişmenî ameyî betalkerdene. Hemrayê ma Memo, Serhat û Êriş yê ke azadkerişê êzidîyan de rolê înano gird est o.15ê êlula 2017î de operasyonê dişmenî de derbeyê pîlî dayî dişmenî ro û şehîd bîyî. Ma pê sereberz ê ke ma nê embazanê erjîyayeyan a pîya têkoşîn kerd. Ma sere de keyeyanê erjîyayeyan ê şehîdanê xo heme şarê welatperwerî yê Kurdîstanî rê serweşîye wazenê.

Nasnameyê hemrayanê ma yê şehîdan wina yê:

Nameyê Qodî: Memo Mêrdîn Name û Peyname: Davut Çelik Cayê Bîyayîşî: Mêrdîn Maye-Pî: Vesile - Ali Tarîx û Cayê Şehadetî: 15ê Êlula 2017î / Cûdî

 

Nameyê Qodî: Serhat Cigerxwîn Dîgor Name û Peyname: İbrahim Gönen Cayê Bîyayîşî: Qers Maye-Pî: Fatma - Hulusi Tarîx û Cayê Şehadetî: 15ê Êlula 2017î / Cûdî

 

Nameyê Qodî: Êrîş Hebûn Name û Peyname: Barış Erkol Cayê Bîyayîşî: Wan Maye-Pî: Bedia - Mehmet Tarîx û Cayê Şehadetî: 15ê Êlula 2017î / Cûdî

 

Hemrayê ma Memo Qoser de yeno dinya û serranê 90yan ke ciwanê kurdî qefle bi qefle verê xo dayêne sefanê gerîlayan, PKKyî nas keno û tewrê xebatan beno. 1996 de esîr kewno destê dişmenî û wextêk zîndan de maneno. Hemrayê xeyrê xoverdayoxanê zîndanan ê ke  zîndanî açarnayî mektebê şorişî, xo perwerde keno û partîya dahîna hol nas keno.  Hemrayê Memo 2002 de tewrê sefanê gerîlayan beno. Rixmo ke o zewijnaye yo û di tutê ci est ê semedê pawitişê welatê xo verê xo dano Koyanê Kurdîstanî û warê Omerya yê Mêrdînî tewrê gerîlayan beno.

Dima ra 6 serrî Heftanîn de gerîlatîye keno û 2008 de sey fermandarê serkewteyî verê xo dano Vakurê Kurdîstanî. Cûdîyê Botanî de 5 serrî têkoşîn keno û 2013 de mîyanê grûbanê rayraşîyayîşê çareserîya demokratîke de agêreno Herêmanê Pawitişî yê Medya. 2014 de vaz dano gazîya Şingalî û vera çeteyanê DAÎŞî şer keno. Şer de birîndar beno la peyser game nêerzeno. Bado ke Şingal çeteyanê DAÎŞî ra yeno xelisnayene 2016 de reyna verê xo Vakurê Kurdîstanî. Tîya xeylêk çalakîyanê serkewteyan koordîne keno û wezîfeyê xo bi serkewtişî ano ca.

Hemrayê Serhat Dîgorê Qersî de yeno dinya bi kulturê welatperwerîye beno pîl. Seba ke apê ci gerîla yo o zî tim wazeno bibo gerîla. Hemrayê ma Serhat 2013 de semedê pawitişê erd û şarê xo verê xo dano koyanê azadan ê Kurdîstanî û nameyê emzayê xo yê şehîd Serhatî geno. Dima ke perwerdeyê şerwananê neweyan geno prosesanê perwerdeyanê bînan de zî xo aver beno ke bibo gerîlayêko serkewte. Xeylêk wext Garê de maneno, xo hetê leşkerî û îdeolojî ra aver beno. 2015 de semedê paştayîşê êzidîyan şino Şingal û vera çeteyanê DAÎŞî şer keno. Badê azadkerdişê Şingalî 2016 verê xo dano Cûdîyî û tîya xebetan de aktîf rol geno.''

Hemrayê ma Êrîş Wan de yeno dinya û keyeyêkê welatperî de beno pîl. Rîyê hêrişanê dewleta tirke ra keyeyê ci bar keno şino Mersin. Tîya vera polîtîkayanê leyminan ê vera kurdan xebatanê ciwanîye de ca geno ke ciwananê kurdan bipawo. 

2014 de tewrê sefanê gerîlayan beno. Bado ke perwerdeyê şerwananê neweyan vîneno Heftanîn de gerîlatîye keno. Dima ra tewrê hemleya azadkerdişê Şingalî beno û vera çeteyanê DAÎŞî şarê xo paweno. Hemrayê ma  ke wezîfeyê xo biserkewtişî ard ca reyna agêreno koyanê bimbarekan ê Kurdîstanî û Cûdî de sey fermandarê serkewteyî gerîlatîye keno.''