YJK-E Festîvala Cinîyan a Zîlane ya 19. ya ke aktîvîteyanê sembolan ê têkoşînê cinîyan ê kurdan ra yew a, do 21ê hezîrene de bajarê Leverkursenî yê Almanya de organîze bikero.

Festîvala ke do bi şîarê “Bi Jin Jiyan Azadî destkewteyanê cinîyan bipawe”bêro kerdene şehîdanê cinîyan ê têkoşînê azadîye yê neteweyî rê yena dîyarîkerdene. 

Almanya, Belçîka û Hollanda ra cinîyê kurdî do tewrê festivale bibê. Eynî wextî de xeylê rêxistinê cinîyan, hunermend û înîsîyatîfê sîvîlî zî do tewrê festivale bibê.

YJK-E eşkerayîya xo de vat festîvala emser do bi rûhê Vengdayîşê Haştîye û Komelê Demokratîkî yê Rayber Apoyî yê 27ê sibate bêro kerdene û ca da nînan: “Festîvala ma ya emserîne goreyê ê verînan atmosferê dahîna muhîm û cîyayî de yena kerdene. Semedê afirnayîşê komelê demokratîkî gerek şorişê zîhnîyetî bêro kerdene. No zî têna serkêşîya cinîyan de beno. Ma cinîyî zanê ke ma eşkenê xo ra dest pê bikerê û zaf çîyan bibedilnê. Serkêşîya komelî de ma eşkenê ser bikewê.” 

Hunermendê sey Chopy, Berfin Mamedova, Baran Bozyel, Binevş Cizirî, Sosin, Nuarin, Ozgur Işik û Zine Botanî zî do tewrê festivale bibê. Reyna pîya bi Hunera Mizgin û grûba domanan Zarok Ma cinîyê dengbêjî zî do vejîyê sehne. Aktîvîte de standê keda cinîyan zî do bêro ronayene û performansê cîyayî zî do ca bîgirê.

YJK-E veng da cinîyan ke wa bi kincanê xo yê neteweyîyan ê renginan û tîlîlîyan tewrê fesîtîvale bibê û vat: “Bêrê ma 21ê hîzerane de Leverkusen de bêrê têhet. Ma pêro pîya wayîrê keda Zîlanan ke xo ma rê kerd feda û bi hezaran ciwananê xo û erjê ke bi nameyê azadîyan ameyî destfînayene bivejê, ma destkewteyanê cinîyan bipawê.”