Festîvala Hesarekî ya Xijkerdişî ya Çewlîgî de namzedê hemserekîya şaredarîye ya HDP’yî ya Çewlîgî Hatîce Kavrane û Hîşyar Ozsoy bi tîlîlî û çepikan ameyî peşwazîkerdene.

Festîvala Hesarekî ya Çewlîgî sey her serre emser zî bi coşî ameye viraştene. Festîvala ke bi hawayêkê nîzamîyî 4 serrî yo yena viraştene xeylî hemwelatijî tewrê ci bîyî. Namzedê hemserekîya şaredarîye ya HDP’yî ya Çewlîgî Hatîce Kavrane û Hîşyar Ozsoy zî bi îdarekaranê HPD’yî yê bajarî tewrê Festîvale bîyî. Namzedî Kavrane û Ozsoy yê ke bi eleqeyê girdî ameyî pêşwazîkerdene, şar silam kerd û derheqê problemanê Çewlîgî û weçînayîşî de qisey kerd. Namzedan bale ante muhîmîya weçînitişî ser û va: ‘‘Hewceyê welatî bi pêkewtişî nê, bi aşitîye û azadîye esta. Çewlîg zî xizmetanê girdan heq keno. Eke şarê ma nê wezîfeyî bido ma, ma do şewe û roje seba şarê xo bixebitê û waştişanê înan bîyarê ca.‘‘ Kavrane û Ozsoy ê ke şarî ra sozê paştdayîşî girewt, dima ra zî bi ciwanan govend girewt û bi çepikan ameyî oxirkerdene.

Hunermendê Çewlîgijî sey Veysel Canli, Avnî Polat û Servet Kocakaya zî tewrê festîvale bîyî û bi deyîranê Zazakî reng da festîvale.