Dêrsim de esnafî binê bara zeman de yê. Festîvala Kultur û Xoza ya Dêrsimî ya 21. zî esnafan ra çare nêbîye. Dêrsimijan derheqê babete de Ajansê Mezopotamya rê qisey kerd. 

Esnaf Şukru Kiliçî da zanayene ke meseleya înan a tewr pîle kêmîyayîşê nufusî yo û vat: ''Şar krîzê ekonomîkî ra koçê teberê welatî keno. Ciwanî nêmendê. Pisporê ekonomî zî nêzanenê ke siba do se bibo.'' Kiliçî ard ziwan ke Festîvala Munzurî sey verî şarî rê faydeyê ekonomîkî nêkena.

Esnaf Celal Orhanî ard ziwan ke vayê berheman goreyê aşma verêne se ra 20 zêdîyayê û vat: ''Şar hînî nêeşkeno çîyêkî bihêrîno coka ma nêeşkenê kar bikerê. Nika kitabêkê çimeyî qasê 200 lîra yo la verî 100 lîra bi. Pê zeman ekonomî hol nêbena. Wezîrê Ekonomî zeman ra ber çîyêk nêzaneno.''

Karker Îlhan Bulutî vat: ''Ez karkerê gazê xozayî ya. Ez fîyatêkî dana muşterî la roja bîne fîyat vurîyeno. Verê cû 5-6 mengan de fîyatî nêvurîyayêne. Hînî na rewşe hol nêbena. Berardiş çin o, mazot beno vay. Çew de hêvî nêmenda. Her kes gêreno ke vejîyo teberê welatî.'' 

Esnaf Sînan Goçelîyî vat: ''Ez 2006 ra nata esnafîye kena. Verê cû 20 karkerê mi est bîyî nika ez eşkena teyna di karkeran bixebitna. Vayê her çî zêdîyenê. Seba ke îqtîdar xirab o ekonomî nê halî de ya.''

Nurgule Çetînkayaya ke 5 serrî yo esnafîye kena vat: ''Tîya cayêko turîstîk o, festîvale zî ameye kerdene la nê zî tesîrê esnafan nêkenê. 6 mengî yo mi kîraya xo nêdaye. Eke wina şêro welat binî ra şino.'' 

 Hemwelatîyê bi nameyê Alîyî vat: ''Krîzê ekonomîkî ra her kesî koç kerdo. Îqtîdarî ekonomî viste nê halî. Eke no hukmat şoro beno ke rewşe vurîyena.''