Silopya de zî hawayê weçînayîşî bîyo berz. Namzeta hemşaredarîye Adalet Fîdane va şar paştdarîye dano înan û wazeno ke sazî û dezgeyanê xo qeyûmî ra azad bikero.

ZEREYÊ XEBATANÊ CINÎYAN DE CA GÊNA

Fîdane serra 1981’î de, yew dewa girêdayîyê Silopya de maya xo ra bîya. Serra 1990’î de dewa  înan hetê dewleta Tirkî ra ameya vêşnayene û keyeyê aye bar keno û yeno Silopya. Fîdane serra 2010’î de akademîya cinîyan de dest bi xebate kena, serra 2014’î de Kurdî-Der de xebetîna û pêyê cû bena endamê meclîsê şaredarîye.

MA DO ZAF BIXEBETÎYÊ

Fîdane bale ante qeyûmanê îşxalkaran ser û va: ”Qeyûman dest nayo keda şarî ser. Wexto ke merdim ewnîyeno ci, zor û zilmê tewr pîlî sazîyanê cinîyan û ciwanan rê keno. Eke ma şaredarîyanê xo ke peyser bigîrê, o wext ma do sazîyanê xo newe ra akerê û bikê xizmetê şarê xo.”

MA DO ŞARÎ RÊ, ŞAR ZÎ MA RÊ PROJEYANÊ XO PÊŞNÎYAZ BIKO

Fîdane va ê do îdareyêkê winasîyî ronê ke, şar xo rasterast zereyê îdareyî de bivîno û wina dewam kerd: ”Şaredarîyî bîyê sey qereqolan, la şarê ma do, weçînayîşî ra dima reyna sey verî, şaredarîye sey keyeyanê xo bivîno. Silopya de 11 taxî estê. Her serê menge, ma û meclîsê şarê taxe do bêrê têhet. Ê do projeyanê xo, ma zî projeyanê xo pêşkêş bikê. Ma do pîya bifikirîyê û pîya bivirazê.”

MA DO CINÎYAN HÎNA ZÊDE BIKÊ ZEREYÊ EKONOMÎYE

Fîdane wina dewam kerd: ”Ma wazenê ke cinîyî hîna zêde zereyê ekonomîye de ca bigîrê û seba naye zî projeyê ma estê. Qeyûm wazeno ke cinîyî keyeyê xo de bimanê û mevejîyê teber. Naye ra zî her çiyî ra ver, dest nabi sazîyanê cinîyan ser. Xora waştişê sîstemî zî wina yo: ‘Wa cinîyî mabênê çar dêsan de bimanê, domananê xo de eleqedar bê û werd bipewjê’.