Fermandaranê YJA-Starî ra Berçeme Cîlo (Nursele Oktay) aslê xo de Behdînanê Başûrê Kurdîstanî ra, êşîra Doskî ra ya. Keyeyê Berçeme tedaya rejîmê ê çaxî ra neçare maneno ke verê xo bido Gever. Berçeme serra 1978î de wareyanê Geverî de yena dinya. Keyeyê Berçeme serra 1993î de tewrê têkoşînî beno, a zî dima verê xo dana koyanê azadan ê Cîloyî. 

Serranê xo yê têkoşînî de Fermandare Berçeme xeylêk waran de koyanê Zagrosî ra heta Amedî şer kena. Kesayetê ci ra semed sey ''Fîlozofa cuye'' yena namekerdene. Serra 2017î de warê Şehîd Remzîyî yê qezaya Licê yê Amedî de leşkeranê tirkan operasyonêk dabi destpêkerene. Gerîla Berçeme, Sabrî Tolhildan, Amed Avaşîn, Agît Koçer, Şevger Amed bi hawayêkê çêrî şer kenê û xo ver danê. Nê şerî de fermandare Berçeme û çar embazê ci şehîd benê.

Fermandare Berçeme Cîlo vîrameyîşanê xo yê Rayber Apoyî wina ana ziwan: ''Mi Serekatî qet nêdîye, têna serra 1998î de mi pê telefonî Rayberîye reyde qisey kerd. Mi netîceya kombîyayîşî Rayberîye rê vate. Mi kelecanî ra lez qisey kerd. Serekî pê kelecanê mi zaf huya û vat: 'To netîceya kombîyayîşî hol arde ziwan. Sey fermandarêka cinîye raştîya mi hol fam bikere û pê na raştîye xo perwerde bikere. Ganî nê di cayan ser o xo aver bere û nê bingeyan ser o xo awan bikere.'

Serekatîye ez qet nêşinasnayêne, mi telefon de xo da şinasnayene. Labelê wexto ke Serekî ê çîyî vatî çew vatêne qey mi şinasneno. Têkoşîn de hînî mi zêdêr giranî daye perspektîfanê Serekî. ''

Embaza Berçeme Leyla Wan seba kesayetê Berçeme wina qal kerdêne:  ''Berçeme zaf asî û rind bîye. Pê heskerdişê koyan pirr bîye. Zanayîşê ci eşkera kerdêne ke a fîlozofa koyî ya. Coka her kes dormeyê aye de ameyêne pêser. Her tim hêz dayêne dormeyê xo. 25 serran têkoşînêko bêhempa kerd. Zagrosan ra heta Amedî rayberîyêka pîle kerde.''

Embazanê Fermandare Berçeme ra Sûlbûs Perî zî vat: ''Ma serranê 98-99an de pîya mendî. Embaze Berçeme tim waştêne ke rayberîya embazan bikerê. Hetê fermandarîye ra zaf xurt bîye. Aye zaf waştêne ke Serek bivîna.''

Endamê Komîteya Rayberdişî yê PKKyî Duran Kalkanî zî seba şexsê Berçeme Cîlo wina qisey kerdêne: ''Asta aye ya famkerdişî zaf berz bîye. Seba caardişê felsefeya Rayberîye zaf xîret kerdêne. Zaf zerrînizm bîye, her kesî rê hetkarîye kerdêne. Şeranê pîlan de ca girewt. Hem sey şerwane hem zî sey fermandare zaf aver şîye. Seba cinîyan bîye modelêke.''