Mehkemeya tirkan 9 kesê ke hewteyê vîyarteyî de seba ke endamê komîsyonê teqîbê prosesê çareserîye bîyî destbend kerdî û tepiştî. Mehkeme înan bi 'endamîya rêxistine' sûcdar kena.

Endamê heyetî Serekê Şubeyê Wanî yê Mazlum-Derî Yakup Aslan, Serekê Şubeyê Wanî yê ÎHDyî Omer Işik, Temsîlkarê KESKî Yilmaz Berkî, Îdarekarê BDPyî yê Wanî Atîlla Kumli, Îdarekara Mazlum-Derî Evîne Keskîn, Hemserekê HDPyî yê Wanî Harun Okay, temsîlkarê rêxistiananê komelê sivîlî Abdulkerîm Bayit, Salîh Îpek û Behîce Abî polîsan vera înan fotografê wextê prosesê çareserîye sey delîlê sûcî mojnayî. Fotografî 2022 de hetê mehkeme ra sey sûcî ameyî hesibnayene.

Mehkemeya tirkan fotografê gerîlayanê ke 10ê çeleyê 2016î de Artemêtan de ameybî înfazkerdene, vera heyetê çimdarîye sey sûcî hesibnayî.

9 kesan îfadeyê xo de ard ziwan ke ê prosesê çareserîye de, bi agahîya dewlete, verê çimanê çapemenîye de şîyî hetê gerîlayan. Rixmê ney zî mehkeme bira tepiştişî daye. Serekê Mazlum-Derî Yakup Aslan nêweşê epîlepsî yo û 69 serre yo. Serekê ÎHDyî yê Wanî Omer Işik zî 67 serre yo.

Wekîla HDPyî ya Wanî Muazzeze Orhan derheqê babete de qisey kerd û ard ziwan ke îqtîdar zî terefêkê prosesê çareserîye bi. Orhane vist vîrî ke wextê prosesî de xeylêk heyetî şîyî koyan û pêvînayîşî kerdî. Muazzeze Orhan vat: ''Nê 9 kesan bi agahîya îqtîdarî kar kerdêne. Îqtîdarî proses çin kerd û nika zî dest pê tepiştişê beşdaranê ê prosesî kerd. Dîmenê ê çaxî sûc nîyê. îqtîdar xîret keno ke pê sûcdarkerdişê embazanê ma xo bixelisno.''