Fermandaranê YJA-Starî ra Şerda Mazlûm Gabar bi wesîleya serrgêra Hemleya 1ê Hezîrane ANFyî rê qisey kerd.

Qiseykerdişê Fermandare Şerda ra tay noqtayê girîngî wina yê:

''Bira Hemleya 1ê Hezîrane hende asan nêbîye. Seba ke Komployê 15ê Sibate ra dima komplogeran xîret kerdêne ke têgêrayîşê ma tasfîye bikerê bira hemle dîyaye. O çax vera xeta cuya azade, xeta xoverdayîşî û  metodê şerî hêrişî zaf bîyî. Ameyêne vatene ke 'hinî wextê şerê gerîlatîye qedîyayo.' Na xete rê xeta tasfîyekeran vajîyaye. Hêzanê tasfîyekeran waşt ke cuya Rayberîye pûç bikerê û Rayberîye marjînale bikerê.

O çax pawitişnameyê Rayberîye 'Pawitişê Şarêkî' zaf çî qetî kerdî û nakokîyî wedarnayî. Hinî xeta azadîye ser o gumanêkê ma nêmendbî. Gerîlayan mesajê netî girewtî. Gerîlayan erkê caardişê xeta Rayberîye girewt xo milî; çunke gerîlayî garantîyê cuya azade, cuya şarê kurdî û Rayberîye yê. O çax gerîlayan 'Pawitişê Şarêkî' wend û tira dersî girewtî. PKK beno ke terzê xo yê têkoşînî bivurno la terzê xo yê ciwîyayîşî do qetî nêvurno. O çax zî wina bi.

Terzê ciwîyayîşî yê PKKyî têkilîyanê embazîye ser o ronîyayo. PKK yew terzê ciwîyayîşî yo. Coka Komployê Mîyanneteweyîyî zî hêrişê nê terzî kerd. Nê hêrişî hema zî dewam kenê. La seke mi vatbi Hemleya 1ê Hezîrane vera tasfîyekeran amebî kerdene. Na hemle vera hêzanê komploger û tasfîyekeran mudaxeleyê xeta Apogîran bîya. Na hemle ra dima xeta Apogîran her ca de serdest bîye coka hemle zaf girîng a.

Wextê hemle de embaze Têkoşîne û embaz Seyîd Riza şîyî warê Dêrsimî, embaz Silave Koçer Sêrt de çalakîye kerde, embaze Bêrîtane çalakîya fedayîye kerde, embaz Bazî Dih û Gabar de çalakîyê pîlî kerdî. Serkewtişê Hemleya 1ê Hezîrane aîdê nê şehîdanê ma yo. 

Hemleya 1ê Hezîrane reyde ame îsbatkerdene ke PKK do qetî cewherê xo ra fek vera nêdo, gerîlayî do pawitişê xeta Rayberîye de israr  bikerê û hêzê xo yê çalakîyan û şerkerdişî bipawê. 1999 de wextê xoapeyantişî de tay warî ameybî vengkerdene. Hemleya 1ê Hezîrane de nê waran de ancî hêzê ma cabîyî. Embazê ma Reşîd û Çîçeke Botan 2010 de bîyî serkêşê Şerê Şarî yê Şorişgêrî. Dima çalakîyê pîlî ameyî kerdene. Hemle dişmen bi giranî lerzna û xeylê warî kewtî binê kontrolê gerîlayan.

Ewro gerîlayî teyna vera dewleta tirke ya îşxalkere ney vera hêzanê hegemonîkan ê globalan zî şer kenê. Artêşa NATOyî bi pêro hêz û îmkananê xo hêrişê ma kena. Şero esas Îmrali de yeno kerdene. Vera têgêrayîş, têkoşînê ma û Rayber Apoyî şero topyekûn yeno kerdene. Hêzê komploger û tasfîyekerî konseptê xo de israr kenê. 

Gerîlayî vera teknîkê NATOyî, leşkeran, çekanê kîmyewîyan û nukleran şerê bêemanî kenê. Gerîlayî garantîyê azadîya şarê ma yê. Dişmen hîrê serrî yo Zap de teng bîyo û derbanê giranan weno. Xeta fedayî ya Rayber Apoyî ney kena. Gerîlayî do na xete de ser bikewê. Heta ke no îrade est bo qet yew hêz do bi PKKyî û şarê kurdî nêeşko. PKK bi tecrube, xoverdayîş, ked û gonîya şehîdan resa nê rojan.''