Îşxalê dewleta tirke yê vera Başûrê Kurdîstanî dewam keno. Hêrişan de sere de sivîlî xeylêk kesan dinyaya xo bedilnaye. Dewleta tirke serranê 1980an ra nata ge ge seba îşxalî hêrişê Başûrî kena û seba ke endama NATOyî ra qet nêna şermezarkerdene.

Vervatoxê Ciwanan ê Neteweyîyan ê Kurdîstanî (CNK) Jiyan Tîmurtaşî û Vervatoxê Têgêrayîşê Azadî Metîn Pîranîyî derheqê hêrişanê dewleta tirke de ANFyî reyde qisey kerd. Tîmurtaşî vist vîrî ke dewleta tirke nêzdîyê 40 serran o ke hêrişê Başûrî kena.

Tîmurtaşî vat: ''Dewleta tirke herêman de ke kurdî îdareyê xo kenê seba ke aramîye çin bikera hêrişê nê cayan kena. Dewleta tirke nakokîya mabênê sîyasetê kurdan zî vînena. Her parçeyê Kurdîstanî wayîrê şert û mercanê xoseran o. Labelê nê hêrişî peynîya peyêne de vera pêro kurdan ê. Coka sîyasetê kurdî ganî xeta vera kolonyalîzmî ser o têkoşîn bikero. Ganî partîyê kurdîstanijî hînî bi hawayêkê cidîyî nêzdîyê mesele  bibê. Bi sîyaseto ke şarî ra dûrî yo, Kurdîstan nêno pawitene.''

Vervatoxê Têgêrayîşê Azadî Metîn Pîranîyî pare kerd ke peyê hêrişanê dewleta tirke de hukmato merkezî yê Iraqî esto. Pîranîyî vat: ''Nê hêrişê ke serranê peyênan de zêdîyayî, serranê 1980an ra nata yenê kerdene. Sîyasetê kurdan ganî bieşkîyayêne na babete de zaf çîyî bikerdêne. Vakurê Kurdîstanî de bi desan dezgeh, partî, rêxistinê komelê sivîlî û komeleyî estê la pêro vera nê hêrişan bêveng ê. Partî û rêxistinê kurdî ganî bi rol û mîsyonê pawitişê destkewteyan ê neteweyîyan têbigêrê û ganî destkewteyê Kurdîstanî bêrê pawitene.''