Çarçewa Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' de tepişteyê dewaya PKK û PAJKî 27ê teşrîna peyêne ya 2023yî ra nata grevê vêşanîye de yê. Seba paştdayîşê grevî keye û merdimê tepişteyan zî Nobeta Edaletî kenê.

Dayîke Meryeme Soyluya ke kênaya ci ya tepişte Amîne Kaya Zîndanê Bakirkoyî de grevê vêşanîye de ya ANFyî rê qala Nobeta Edaletî kerde.

Dayîke Meryeme Soylu pare kerd ke a teyna bi rayîrê telefonî eşkera kênaya xo de qisey bikera û nêeşkena hertim şora Îstanbulî. Dayîke Meryeme vat: ''Tepişteyî rixmê şertanê xiraban û tecrîdê zîndanan zî bi moralî payan ser de yê. Dişmen çend bikero zî do nêeşko îradeyê tepişteyan bişikno. Domanê ma yê tepişteyê sîyasîyî hucreyê yewkesî de tepişîyenê. Vera tepişteyan şero psîkolojîk, tecrîd û îşkence yenê kerdene. Ma nînan qebul nêkenê coka tîya de yê.''

Dayîke Meryeme da zanayene ke tecrîdê vera Rayberê Şarê Kurdî Abdullah Ocalanî pêro zîndanan ra vila bîyo û vat: ''Domanê ma wazenê ke wa tecrîdê Îmraliyî wedarîyo. Heta waştişê înan bêro caardene ma do çalakîya xo rê dewam bikerê. Tepişteyê nêweşî mîyanê dêsan de yê. Ma venga pêro keyeyan û şarê ma danê ke wa paştî bidê têkoşînê tepişteyan. Wa paştî bidê Nobeta Edaletî.

Ma sey dadîyan teyna haştî, edalet û wayûbiratîye wazenê. Ma nêwazenê ke domanê ma zîndanan de bimirê. Ez venga dadîyanê tirkan zî dana ke wa paştî bidê ma. Ganî şarê kurdî bişinasîyo. Ganî meseleya kurdan çareser biba. Mefteyê çareserîye zî Rayber Apo yo. Ma tecrîdê vera Rayberê xo qetî qebul nêkenê.''