'Ganî komelê êzidîyan wayîrê hêzanê xopawitişî YBŞyî bivejîyo'

''Heta ke ma estbê ma do rêçê şehîdan ser o bibê. Vera gefanê dewleta tirke ma do gamêke zî apey nêerzê."

Endamê Mektebê Sîyasî yê Partîya Azadîye û Demokrasîyî ya Êzidîyan (PADÊ) Hemed Bişarî derheqê hêrişanê dewleta tirke yê vera Şengalî de Radyoyê Dengê Çira Şengalê reyde qisey kerd.


Beşêkê qiseykerdişê Bişarî wina yo: "Hêrişê dewleta tirke seba ma çîyêko newe nîyo. Dewleta tirke tarîx de bi seyan fermanan êzidîyî qir kerdî.  Nika zî wazenê newe ra Osmanijan awan bikerê. Wazenê roşnîya ma tarî bikerê, kulturê ma, vîrê ma, bawerîya ma çin bikerê.

Pêro dinya zanena ke YBŞyî vera DAÎŞî şer kerd û reyna pêro dinya pê çimanê xo vînena ke dewleta tirke hêrişê ma kena û şerwananê ma kena hedef. La reyna zî vera kerdişanê dewleta tirke her kes beno lal û kor.

15ê çeleyê 2020î de dewleta tirke şerwanê ma şehîd kerdî la bi hezaran şerwanî nika çeperanê şerî de qesasê embazanê xo geş kenê. Heta ke ma estbê ma do rêçê şehîdanê xo teqîb bikerê û hewn û xeyalanê înan bîyarê ca.

Eke şarê ma şîyar nêbo dewleta tirke do nê hêrişanê xo dewam bikera. Şerwanê ke seba erdê ma şer kenê û canê xo feda kenê ganî ma wayîrê înan bivejîyê. Ez venga pêro şarê ma dana ke wayîrê hêzanê xo û erdê xo bivejîyê û vera hêrişanê dewleta tirke bibê yew. Têna yew çareserîye esta; ma nê hêrişan rê cewab bidê û yewîya xo xurtêr bikerê. Ma do gamêke zî apey nêerzê."