Hemserekê Dîwanê Meclîsê Şarî yê Mexmûrî Elî Urekî derheqê hêrişanê vera Mexmûrî, tecrîdê vera Abdullah Ocalanî û xoverdayîşê gerîlayan de ANFyî rê qisey kerd.

Urekî da zanayene ke şexsê Abdullah Ocalanî de kurdî yenê tecrîdkerdene û vat: ''Komplogeran waştêne kurdan qir bikerê la Rayberîye planê înan pûç kerdî. Reyna dewletanê neteweyan zî Rayberîye verê xo de sey astengîye dîyêne. Înan armanc kerd ke têkilîya Rayberîye ya bi şar û gerîlayan biqerifnê.

60 rojî yo gerîlayan vera hêrişanê îşxalî xo ver danê. Gerîla û Rayberîye heta nika çi kewtî milê înan kerd. La bêvengîya nikayêne bi taybetî yê Vakur û Başûrî rayîr dana ke dişmen bireso armancanê xo. Ganî şarê ma vera ney tewirêkê zaf cidîyî bimojno. Gerîlayî çeperan de şer kenê la PDK dormeyê gerîlayan gêno. No bi xo şerê birakûjî yo. La ma wazenê yewîya kurdan awan biba.''

Elî Urekî ard ziwan ke zulmo ke vera şarê Mexmûrî yeno kerdene qetî nêno qebulkerdene û vat: ''Hêrişê ke vera Rayberîye û Têgêrayîşê Azadîye yenê kerdene hêrişê vera Mexmûrî yê zî. Pê hêrişanê vera Mexmûrî yeno waştene ke îradeyê şarî bêro teslîmgirewtene. Dewleta tirke armanc kena ke ça de yew kurdo azad bo bikişa. Ma multecîyê sîyasî yê. Ganî her kes mesuldarîya xo bîyaro ca û na kampa multecîyan bipawa. 

Turkmen Erşad Salihî Mexmûr keno hedef û ci rê gefan waneno. No merdim senî vano o do hêrişê Mexmûrî bikero? Ganî Iraq derheqê na babete de ey hişyar bikero. Eke Mexmûr de çîyêk bêro hemwelatîyanê ma sereyî mesuldar Erşad Salihî yo. Erdogan û no mêrik şirîkê DAÎŞî yê. 

Ma rê tek rayîrê serfîrazîye awankerdişê yewîye yo. MA venga pêro kurdan danê ke vera îşxalî vinderê, dormeyê Hemleya Wextê Azadîye de bibê yew. Seba dîyaloganê mabênê PDK û PKKyî ma amade yê. ''