Endamê Komîteya Rayberdişî ya PKKyî Murat Karayilanî bernameyê taybetî yê Stêrk TVyî de persanê Rosîda Mardîne rê cewabî dayî.

Karayilanî vat: “40 serrê ke bi PKKyî Kurdistan de ravêrtê biraştî zî tarîxêko destanî û qehremanî yo. Bi na wesîleye ma şexsê şehîdê PKKyî yê ewilênî Hakî Karerî de heme şehîdanê xo bi vîr anê, sozo ke ma dabi şehîdan reyna danê.”   

NEZERÊ MA DE QÎMETÊ QERARÊ AMERÎKA ÇINYO

Karayilanî qerarê Amerîka yê derheqê hîrê kadroyanê serkêşan ê PKKyî de nê vatî: “Ma het de qîmetê nê qerarê Amerîka çinyo. Ma bi terzêkê xoserî bi serran o koyanê Kurdistanî de yê û ma do tim zî bibê. PKK îdeolojîyêk a, felsefeyêk a, ruhêk o û bi des hezaran kadroyê ci estê. Na yewe ra bi 3 kesan PKK pey de nêşino, wa her kes nê bizano.

GANÎ ŞARÊ KURDÎ HEMVERÊ NÊ QERARÎ DE BÊVENG MEMANO

No qerar tewirêk o ke hemverê meseleyê kurdan de ameyo girewtene. Yanî bi hawayêk wazenê ke mucadeleyê şarê kurdî û mucadeleyê azadîya şarê kurdî xirab ramojnê. Na yewe ran o qerar tenya hemverê PKKyî de nêgîrîyayo, hemverê hemeyê şarê kurdî de gîrîyayo.

Şarê ma zî vîneno ke no qerar hemverê înan de yo, no tesbît tesbîtêko raşt o. Ganî şarê ma û bêguman heme hêzê welatperwerî hemverê nê qerarê bêrûmetî de bêveng memanê. Tîya ra 20 serrî verî şexsê Rayber Apoyî de hemverê şarê ma, mucadeleyê azadîya Kurdistanî û têgêrayîşê ma de komployêk amî viraştene. Rayberê ma nê bingeyî de ame esîrgirewtene û Tirkîye rê ame teslîmkerdene. No qeraro newe zî dewamê sîyasetê komplo yo.

WEXTÊ QERARÎ MERDIMÎ DANO FIKIRNAYENE

Seke yeno zanayene xeylî welatan de seba azadîya Rayber Apoyî nê wextan de cehdê muhîmî estê. Senî semedê Nelson Mandelayî kampanya virazîyabî, semedê Rayber Apoyî zî kampanyayêka winayêne rojdem de ya. Wextêkê winayênî de gîrîyayîşê nê qerarî merdimî dano fikirnayene.

PKK bi hawayêkê nêheqî gîrîya lîsteya terorî ya Yewîya Ewropa û naye ser o dewayêk amî akerdene. Nika na dewa Mehkemeya Ewropa de dewam kena. Adeta bi fikaro ke do PKKyî lîste ra vejê înan bi nê qerarî waşt ke mudaxele bikerê.   

HEMKARANÊ DAÎŞÎ RÊ XELATÎ DÎYENÊ, HEMVERÊ ÎNAN ZÎ YENÊ CEZAKERDENE

Ewro mucadeleyêk esto ke hemverê DAÎŞî de yeno dewamkerdene û no mucadele ver bi netîce şino. DAÎŞ bi pêroyî tehluke bîyayîşî ra vejîya û paytextê ci kewt. Hêzê ke bîyî sebebê xurtbîyayîşê DAÎŞî û ê kerd belayê şaranê Rojakewtena mîyanêne û şaranê dinya ewro bi nê qerarê Amerîka adeta înan rê xelate yena dayene.  

No qerar komplo bi xo yo. Wazenê ke mucadeleyê azadîya Kurdistanî tasfîye bikerê. Tewir tenya hemverê PKKyî de nê hemverê heme kurdan de ameyo ramotene. Oyo ke her hîrê perçeyanê bînan girê dano Vakurê Kurdistanî yo. Nîmeyê coxrafyaya Kurdistanî yo. No zihnîyet bi xerckerdişê Vakurî wazeno ke Tirkîye bianco hetê xo ser û xo rê ci ra îstîfade bikero. Tirêm do kurdî tewirêkê senî ramojnê? No xusûs seba neteweya kurdan muhîm o. ganî ma kurdî hendî rengê xo neteweyîyî ramojnê.

Senî ma hêrişê DAÎŞî yê hemverê Kerkukî sey hêrişêk ke ma rê bîyo dî, ganî organîzasyonê bînî zî nê hêrişî sey hêrişêk ke hemverê înan de bîyo bivînê. Amacê TCyî tenya tasfîyekerdişê PKKyî nêyo, tasfîyekerdişê heme destkewteyanê kurdan o.      

DEWLETA TIRKÎ WAZENA HER CA DE QIRKERDIŞÊ KURDAN BIDOMNO

Merkezê stratejîya dewleta tirkî de hewna zî qirkerdişê kurdan esto. Na yewe ra kurdan ra tersena, hemverê kurdan de fobîya ci ya xeylî pîle esta û dişmenîya kurdan kena. Zihnîyetê AKP-MHP-Ergenekonî yo faşîst o nijadperest ke nika Tirkîye de îqtîdar o seba ke kurdî nêbê wayîrê statuyêk her çîyî xo erzenê werte.

Zihnîyetê înan o nijadperest tenya bi zereyê sînoranê Tirkîye bisînor nêyo. No zihnîyet wazeno qanûno bingeyên ê Sûrîye de her kes sey ereb bêro hesibnayene. Senî ke Tirkîye de her kesî sey tirk hesibnenê. No zî sîyasetê qirkerdişî yo ke serê kurdan de yeno bicaardene. Tirkîye wazena nê sîyasetê qirkerdişî her ca de bica biyaro.

Dewletê sey Rûsya û Amerîka na zihîfîya Tirkîye vînenê û bi pratîk û qeraranê winayênan Tirkîye ra tawîzan gênê. Bêguman nê nizdbîyayîşî de tu exlaqêk çinyo, merdimayî çinya. Hêdî bes o!

SÎYASETÊ XO YÊ KURDAN DE SAMÎMÎ NÊYÊ

Kurdan şerê hemverê DAÎŞî de serkêşîye kerde û xeylî şehîdî dayî. Adeta sey dêsêk hemverê DAÎŞî de vindertî. Naye ser o tayê dormeyan de bendewarîya do hêzê mîyanneteweyî kurdan rê wayîr vejîyê virazîya. Înan vatêne belkî dewletê bihêzî do tayê çîyan de ancî hemparî bikerê la do dişmenîya kurdan de nêbê yew.

No qerarê Amerîka heme bendewarîyê ê dormeyan serûbin kerdî. Eşkera bi ke dewletê kapîtalîstî tenya ewnênê menfaatê xo ra. Ça înan rê destdaya bo xo danê a kîşte. Seke mi vat ma sey PKK nê meseleyî de şaş nêfikirîyayî. Ma zanayêne do kam xo bido kamcîn kîşte.

FELSEFEYA RAYBER APOYÎ UNÎVERSAL A

Tu qolêkê PKKyî çinyo. PKK partîyêka yewwucûd a. Amac, program û taktîkê partîya ma bewlî yê. Rayber Apo wayîrê paradîgma û felsefeyêka xeylî hîraye yo. Qisimêkê şarê ereban o muhîm Rayber Apoyî sey rayberê xo vînenê. Fikir û felsefeya Rayber Apoyî qaso ke neteweyî ya hende zî unîversal a. Êyê ke xeta ci xo rê rayber bigîrê eşkenê a xete de rayîrêkê azadîye akerê. Miletanê cîya-cîyayan ra xeylî şarî fikir û vînayîşanê rayberê ma teqîb kenê û Rayber Apoyî sey rayberê xo vînenê.    

HEMEYÊ ÇETEYAN TIRKÎYE DE YÊ

Selahîyetdar Jeffry vano ‘eke paştîdayîş û koordînasyonê Tirkîye ra nêbîyêne ma nêeşkayêne Vakurê Sûrîye de bi ser bikewê.’ Ganî birêz Jeffry biewnîro belgeyanê Pentagonî yê serranê

2014-2015î ra. Ê wextî de selahîyetdaranê Amerîka vatêne heta Tirkîye paştîdayîşê DAÎŞî ra fek vera nêdo DAÎŞ nêeşkeno bêro qedênayene. Yanî oyo ke DAÎŞ kerd pîl dewleta Tirkîye bî. Cerablûs û Bab de zî çeteyî estbî. Dimayê operasyonê Tirkîye ra ê şîyî ça? Bêguman heme ravêrtî Tirkîye. Nika nê çeteyî heme binê kontrolê Erdoganî de yê.     

XOVERDAYÎŞÊ PKKYÎ YÊ HEMVERÊ DAÎŞÎ BI UMÎD

Eke Kobanê bikewtêne do DAÎŞî şahanşahîya xo îlan bikerdêne û Tirkîye rê bibîyêne embiryan. Xora Tirkîye zî no çî waştêne. YPG û YPJyî ûca xoverdayîşêkê tarîxîyî ramot, ma zî mudaxele kerd û bi hêzê xo paştî da nê xoverdayîşî. Dimayê mudaxeleyê ma ra hêzê Koalîsyonî zî paştî da nê xoverdayîşî û Kobanê nêkewte destê DAÎŞî. Têgêrayîşê ma seba heme hêzanê demokrasî û merdimîye hemverê DAÎŞî de şerêko xurt dayo û nê mucadeleyî de rolêko pîl kay kerdo.

Erdogan bi xo çeteyanê El Nusra û DAÎŞî perwerde keno. Vatişê êyê hemverê çeteyan bi temamî zûr ê. No qerarê Amerîka karê Erdoganî hîna keno asan. Dewleta tirkî bi hêz û cesareto ke nê qerarî ra girewto tenya Vakurê Kurdistanî de nê, beno ke Başûr û Rojava de zî cigêrayîşanê xo yê îşxalkerdoxan bikero vêşî. Bi nê hawayî Amerîka paştî dana polîtîkayanê qirkerdişî yê dewleta tirkî.       

HÊZO KE AZADÎYE TEMSÎL KENO MA YÊ

Ma bi hawayêkê xozayî hemverê dewleta tirkî ya faşîste de xo ver danê. Ewro Rojakewtena mîyanêne de hêzo ke aşitî, dîyalog û azadîye temsîl keno ma yê, PKK yo. Ma biratîya şaran wazenê. Yewî û pêresayîşê şaran wazenê. La heto ke nijadperestî û dîktatorîye temsîl keno dewleta tirkî ya îşxalkar a.

Ma xo ra bawer kenê û dewaya ma heqdar a. Na yewe ra îhtîyacîya ma bi îcazetê tu hêzêk yan zî dewletêk çinya. Heta azadîya Kurdistanî ma do mucadeleyê xo bidomnê. Ma hêzê xo îdeolojî û felsefeya Rayber Apoyî ra, şarê xo ra û xo ra gênê. Ganî her kes nê rind bizano.

Şarê ma her roje meydanan de mîyanê çalakîyan de yo. Ma şarê xo seba qerardarîya înan pîroz kenê û wazenê ke mucadeleyî hîna bikerê xurt. Ma raştîyêka tarîxkî û komelkî yê. Ma wazenê serra 41. ya PKKyî bikerê serra qezencanê pîlan. Bi na bawerîye ma ancî hemeyê şarê xo rê û welatperweran rê na serra PKKyî ya neweye de serkewtiş wazenê.