Hêrişê îşxalî yê dewleta tirke yê vera Herêmanê Pawitişî yê Medya dewam kenê. Dewleta tirke ya îşxalkera ke nêeşkena xoverdayîşê gerîlayan bişikino çeka kîmyewîye zî tede heme metodanê leyminan şuxulnena.Gerîla Dr. Tîjda Amed hêrişê îşxalî yê dewleta tirke û şuxulnayîşê çeka kîmyewîye ANFyî rê ercnayî.

Tîjda Amed vist vîrî ke hêrişê îşxalî bi hemkarîya PDKyî yenê kerdene û wina qisey kerd: ''Dewleta tirke rixmo ke heta nika heme çeke û teknîkê o şuxulnayî nêeşkaye xoverdayîşê gerîlayan bişikno coka çeka kîmyewîye şuxulnena. Kena ke wina dormeyê Herêmanê Pawitişî yê Medya bigêrêo, gerîlayan bigêro binê ablûqa û herême îşxal bikero.  Ewro bi bahaneyê PKKyî nê hêriş kena la siba herra Başûrî, PDK û hukmatê Başûrî zî do nê tehlukeyî dir rî bi rî bimanê. Ganî nê tehlukeyî bêrê vînayene. Ma sey gerîlayan vera hêrişanê dewleta tirke do cevab bidê. Embazê ma mewzîyan de xover danê.

Dewleta tirke bi şuxulnayîşê çeka kîmyewîye sûc kena. No sûc vera gerîlayan bi desan rey ame kerdene. Dewleta tirke hem hewayî ra hem zî erdî ra hêriş kerd la nêeşkaye netîce bigêro. Wazena bi çeka kîmyewîye netîce bigêro. Ganî dezgehê mîyannetewyî vera nê vejîyê. Sere de şarê ma yê Başûrê Kurdîstanî ganî çar parçeyanê Kurdîstanî de şarê ma vera dewleta tirke nêrazîbîyayîşê xo bîyaro ziwan.  Dewleta tirke ya îşxalkere bi paştdayîşê welatanê xerîban çeka kîmyewîye şuxulnena. Îqtîdarê AKP-MHÎyî pê hêrişan wazeno kurdan bîyaro xeta xo ser.

Ganî PDK zî hinî hemkarîya dewleta tirke caverdo. No têna semedê gerîlayan tehdît nîyo. Semedê sîvîlan zî tehlukeyo pîl o. Xeta îxanetî semedê komelî tehlukeyêk o. Hetê bînî ra ganî hukmatê Iraqî zî bêveng memano. Dewleta tirke ya îşxalkere Iraq û Başûrê Kurdîstanî de şer reyra bena la Iraqî têna pê qale nêrazîbîyayîş mojneno. Ganî tewirêko xurt bêro mojnayene.  Her kes ganî vera nê sûcî vejîyo. Qedexekerdişê çeka kîmyewîye ganî têna pêkerdişan de memano pratîk de destûr mero dayene ke bêro şuxulnayene. Seba ke çeka kîmyewîye hinî mero vetetene, rotene û şuxulnayene ganî medya de bibo rojdem.

Ewro Zap û Avaşîn de xoverdayîşêko pîl est o. Hêrişî hema dewam kenê. Heta nika dewleta tirke waştişê xo dest nêfînayo. Gerîlayî bi îradeyê xurtî ke îdeolojîya Rayber Apoyî ra hêz geno, xover danê. Gerîlayî do bi xeta xoverdayîşê Rayberîye şar û welatê ma azad bikerê. No têkoşîn û xoverdayîş do serkewtişî bîyarê.''

''