Karasuyî qerarê Amerîka yo ke derheqê 3 îdarekaranê PKKyî de girewtibi ANFyî rê ercna.

Karasuyî vat: “Senî ke şarê kurdî komploya hemverê Rayberê Şarê Kurdî Abdullah Ocalanî ke 1998 de amîbî viraştene veng vete, do na komplo zî veng vejo. Serra 21. ya komplo de hetê Amerîka ra gîrîyayîşê nê qerarî dewamê komploya mîyanneteweyîye yo. Ganî Amerîka bizano ke dinya sey rojawanê wehşîyî nêna îdarekerdene. Kurdî zî heydûtê ê rojawanê wehşîyî nêyê. Eke heydûtîyêk esta o zî Amerîka ya.”

Karasuyî wina dewam kerd: “No hêriş hêrişê hemverê heme kurdan de yo, tenya hemverê PKKyî de yan zî Têgêrayîşê Azadîye de nêyo. Amerîka nêeşkena sey Tirkîye vajo kurdî cîya yê, PKK cîya yo. Dewlete tirkî qirkerdox a, loma wina vana. Eke Amerîka zî vana nê çîyî cîya yê, a zî sey dewleta tirkî qirkerdox a. Qeraro ke hetê Amerîka ra gîrîyayo bi temamî qerarêko ekonomîk o û seba mefaatanê sîyasîyan ameyo girewtene. Mumkun nêyo ke no bêro qebûlkerdene. Şarê ma senî komploya 1998î veng vete, do na zî veng vejê.”   

RAYBERÎYA PKKYÎ DAÎŞ BIN FÎNAYO

Karasuyî vat: “Amerîka bi nê qerarê xo tenya hêrişê şarê kurdî nê, hêrişê heme erc, exlaq û wijdanê merdimayîye kerdo. Qaşo xo ra vanê demokrat, dinyaya azade û qalê azadîye kenê. La hemverê têgêrayîşê azadîye de ke seba şarê tewr mezlûmî yê seserra 21. mucadele kena zî hêrişêkê winayênî kenê. No hêriş hemverê şarê kurdî de yo. Rojakewtena mîyanêne de PKKyî serkêşîya mucadeleyê hemverê DAÎŞî kerde. Amerîka vana ke a zî hemverê DAÎŞî de şer kena. Hêzo ke DAÎŞ bin fînayo PKK yo.”   

WA ÇEW NÊKEWO CEHDÊ PERÇEKERDIŞÊ KURDAN MÎYAN

Karasuyî dewamê qiseykerdişê xo de vat: “Êyê ke sînorê Kobanê-Pirsusî de moral dayî şerwanan û heta zereyê Kobanê de pîya bi şerwanan şer kerd sempatîzan û mîlîtanê PKKyî bî. Hewna ke na raştîye werte de ya, eke bêro vatene êyê ke ûca hemverê DAÎŞî de şer kerd cîya û êyê ke Şengal, Kerkuk, Mexmûr û koyan de şer kenê cîya yê no nêno qebûlkerdene. Na dirîtî ya. Cehde perçekerdişê kurdan o. Wa çew nêkewo cehde perçekerdişê kurdan mîyan. Demêk ke kurdî cuya azadîye û statü wazenê waştişê perçekerdişê kurdan dişmenîya kurdan a. Na yewe ra ma nê nizdbîyayîşê Amerîka bişidet şermezar kenê.  

Şarê Amerîka mücadeleye demokrasî û azadî dayo. Na yewe ra înan de kulturêko demokratik, exlaqêk û wijdanêk esto. Ma veng danê şarê Amerîka ke hemverê nê qararê bêexlaq û bêwijdanî de tewir bigîrê.”

HEMVERÊ QERARÎ DE GANÎ MUCADELE HÎNA ZAF BÊRO XURTKERDENE

Karasuyî peynîya qiseykerdişê xo de nê vatî: “Bi nê perspektîfî ma tenya şarê kurdî nê, veng danê heme şaranê averperwer ê merdimayîye û hêzanê demokratîkan ke hemverê nê qerarî de reaksîyon ramojnê. Çunke no qerar hemverê merdimayîye û demokrasî de yo zî. Ma veng danê Amerîka ke fek nizdbîyayîşanê perçekerdişê kurdan ra vera bido. Nê bingeyî de ez veng dana şarê ma û hêzanê demokrasî ke mucadeleyî hîna xurt bikerê.''