Zîndanê Asayîşê Berzî yê Wanî de teda û zorbazîya vera tepişteyan dewam kenê. Şerafettîn Demîro ke serra 2011î ra nata zîndan de yo û 3 serrî yê ke hucreyê yewkesî de yeno tepiştene 10ê çeleyî de binê nameyê cigêrayîşî de 10 gardîyanan eşt hucreyê ey ser û îşkence bi ey kerd.

Babî Cemal Demîrî pare kerd ke 10ê çeleyî de lajê ci yo bîn û cinîya ci şîyî pêvînayîşê lajê xo û vat: "Reya verêne înan rê vat ke dore nêameye şima û dima zî vat ke Şerafettîn berdo bi nêweşxaneyî. Destûr da înan ke lajê mi odayêka dûrî û kurî de bivînê, çunke ma her tim odaya normale ya vînayîşî de lajê xo zîyaret kerdêne. Uca de cinîya mi vînena ke destê lajê mi Şerafettînî de rêçê derbî estê. Dima ey ra persena û Şerafettîn zî vano 10 gardîyanan eşt hucreyê ey ser, hucre serûbin kerd û îşkence bi lajê mi kerd. Dima zî lajê mi berdo revîr la raporê derbî nêame dayene ci."

Babî Cemal Demîrî muracatê Şubeyê Wanî yê Komeleya Heqanê Merdiman (ÎHD) kerd û vat: "Gelo Îslamîyet de çîyêko winasên esto? Senî 10 kesî hucreyêk de hêrişê kesêkî kenê? Edaletê şima ça de yo?"