Gerîlayan Roşanê Newroze yê şarê Kurdî û heme şaran ê ke vera zulmî xover danê pîroz kerd û çalakwanê grevê vêşanîye yê ke Roşanê Newroze bi xoverdayîşê xo tacîdar kenê, silam kerdî.

Gerîlayê HPG’yî Cotyarî şexsê Mazlûm Doganî de înan ê ke roja Newroze bedenê xo dayo verê adirî bi hurmet yad kerdî û va: ‘‘Newroze semedê Kurdan roşanê ganîbîyayîş û newebîyayîşî ya. Ez umîd kena ke na Newroze yewîya Kurdan û serkewtişî bîyaro.”

Gerîla Ocalanî zî vist vîrî ke Newroze rojêka bimbarek a û tede xeylî xoverdayîşî estî û va: ‘‘Menga Adare xo ra menga şehîdan a. Xeylî embazê ma yê erjayeyî na menge de bîyî şehîd. Newroze ma de yadkerdişê şehîdan û bi qerardarîye xeta înan de şîyayîş a.”

Gerîla Adîlî zî xoverdayîşê şarê Kurdî yê vera faşîzmê AKP’yî sey serewedartişê Kawayî yê vera Dehaqî name kerd û va: ‘‘Ma sey xoverdayoxî yê nê şarî çirey do destur nêdê talan û îşxalê dehaqan û vera heme polîtîkayanê înan ê îmhakerdişî bibê sîper. Senî ke Mazlûm Doganî bedenê xo tafîna, Newroze pîroz kerde û ma rê bi roşnayî, ma zî sey gerîlayê Kurdî heta ke Rayber û şarê ma bibê azad, dormeyê nê adirî de yê.‘‘

Gerîla Erdalî zî tarîxê Newroze arde vîrî û wina va: ‘‘Xoverdayîşo ke bi Kawayî dest pêkerd, 35 serrî cuwa ver reyna şexsê Fermandar Egîdî de xo kerd newe û roja ma de şexsê Çîyageran de dewam keno. Rayber Apoyî 21’ê Adare ra heta 28 Adare ke roja şehadetê Egîdî ya, sey Hewteyê Qehramanîye ercna. Ewro xeta qehremanîye rayberîya şarê Kurdî yê welatperwerî de aver şina. No zî ramojneno ke serkewtiş miheqeq ê ma yo. Şexsê Leyla Guvene de hemrayanê zîndanan û heme xoverdayoxan silam kena.‘‘