Mehmet Çoreşoglu 5 serrî yo tepişte yo. Çoreşoglu Zîndanê Boluyî de grevê vêşanîye yê tepişteyan ê vera tecrîd û binpaykerdişanê heqanê zîndanan de ca gêno.

Dadîya Mehmet Çoreşogluyî Kiymete Çoreşoglu ard ziwan ke waştişê tepişteyan meşrû yê û ganî hukmat nê waştişan bîyaro ca. 

Dayîke Kiymete vat: ''Lajê mi hema ke birîndar bi tepişîya û nêame dermankerdene. Hema zî lînga ey dejena. Dima zî lajê mi Amedî ra surgunê Zîndanê Boluyî bi.  Seba ke rewşa ma ya ekonomîke zî hol nîya ez nêeşkena şora lajê xo bivîna. Lajê mi serra 2018î de zî tewrê grevê vêşanîye bibi. Tepişteyî vanê ê do waştişanê xo ra fek vera nêdê û waştişê înan zî heq ê. Eke nê waştişî nêrê caardene o çax tepişteyî dest pê rojeyê mergî kenê. Gelo ê pabeyê mergê domananê ma yê? Ma sey Mayanê Haştîye tim haştîye waşte û azadîye pawite. Ganî hukmat babeta grevê vêşanîye de gamêke bierzo. Wa waştişê domananê ma bîyaro ca. Wa domanê ma azad biciwîyê. Ma naye ra ber çîyêk nêwazenê.''