Gerîlayê HPGyî Hakî Zîlanî qala hêrişê PDKyî yê vera gerîlayanê Xelîfanî kerde.

Gerîla Hakî Zîlanî vat:

''Nameyê mi Hakî Zîlan o. Semedê tay xebatan ez warê Qendîlî de mendêne. Dima ke xebatê mi qedîyayî ez Behdînan de ameya wezîfedarkerdene. Koma ke do bişîyêne Behdînan tede 7 kesî estbîyî. Cara kome de di embazî kurye bîyî. Raywanîye ra verî embazan ma hîşyar kerdî û vat: 'Vera provokasyon û meseleyan bitedbîr bê.' Ma 23ê tebaxe de şan kewtî rayîr. Ma ra verî warê Bêxme yê Xelîfanî de PDKyî hêrişê 3 embazanê ma kerdbi û nînan ra xebere çinbîye. Coka ma bi hîsgerî nêzdîyê na raywanîye bîyêne.

Heta Awa Zapî ma bê problem şîyî. Semedo ke ma nêasê şewan şîyêne, rojan zî verê xo kontrol kerdêne. Ma nêzdîyê waranê sivîlan û noqtayanê leşkerîyan nêbîyêne. Şewa 28-29ê tebaxe de ma resayî Awa Zapî. Ma serê awe ra do biresnayêne Behdînanî. Ma vera dormeyê xo kontrol kerdêne. Uca de noqtaya PDK yan zî yê hêzêkê bînî çinbîye.

Ma Awa Zapî ra derbaz bîyî, kişta awe de bîyî. Embaz Serdem vernî de bi, peyê ey de embazî Şoreş Colemêrg, Şoreş Mêrdîn, Tolhildane, Axîne û Brûsk estbîyî. Ez tewr peynî de bîya. Ma awe ra 100 metre dûrî bîyî nişka ra bêhîşyarîye û vengdayîşî bi hawayêkê bêmabênî ma ser o guleyî ameyî varnayene. Ma kişta awe ra tayêk dûrî bîyî û erazîyêko duz vejîya vernîya ma. Verî ma fam nêkerdo ke kamî hêrişê ma kerdo. Înan serê giranê ê erazîyî de pê çekanê giranan dayêne ma ro.

Raşta zî dafikêka qeleş û hêrişêko namerd bi. Armancê înan ne esîrgirewtiş bi ne zî birîndarkerdiş. Verî ke hîşyar bikerê, pers bikerê înan raşta raşt hêrişê ma kerd. Armancê înan îmhaya gruba ma bi. Embazê ke vernî de bîyî cade ginayî erdî ro, mi zî xo eşt war. Embazî Tolhildane, Axîne û Brûsk verê mi de cade şehîd bîyî. Mi venga înan da la înan cewab nêda. Semedo ke ê vernîya mi de bîyî guleyêk nêgina mi ro. Ez nêzdîya kerrayan bîya coka mi xo eşt mîyanê nê kerrayan.

Pirodayîş û gulevarnayîşo verên qasê 15-20 deqayan dewam kerd. Mi bi vengêkê berzî venga embaz Şoreş û Serdemî kerd. La înan  cewab bîda. Xora tarî bîye, çîyêk nêasayêne. Mîyanê a alozîye de çeka mi destê mi ra kewtbî. Ez dima pê hesîyaya ke tek terefî ra hêriş yeno kerdene û embazî şehîd bîyî. Înan 02:30 ra heta serê sibayî bêmabên ma dayî guleyan ver. Mi xo bineyna eşt apey û xo kamufle kerd. Mi vengê înan eşnawitêne. Serê sibayî wesayîtêko zirxîn ê PDKyî ame û mi fam kerd ke ê hêzê PDKyî yê. Ê raşte raşt ameyî cayê serebûtî. Dima cayê embazan ra vengê guleyan ameyî. Vengê çeka ferdî ya M16î ameyêne. Dima vengê 9 gulayan û vengê 12nê guleyan ame. Eke embazêk zî weş mendo o zî pê nê guleyan merdo. Dima vengê guleyan binî ra qedîya.

A raywanîye de vîrameyîşê 6 embazanê mi kerd ke ez payan ser o vindera. Mi embazî cayê xo de hîs kerdêne û ney hêz dayêne mi. Rayîr de çimê mi rêçê înan de bîyî. Ez rayîran ra gêrayêne rêçê mekapanê embazan. Rojan ra dima binê kerrayan de mi rêço winasên dî. Mi fam kerd ke ez nêzdîyê cayê embazan bîya. Ê helan de çîyê ke embaz Şoreş Mêrdînî Dengizê Sipî de ciwîyabî ameyêne mi vîrî û mi nê çîyî xo rê kerdêne tecrube.

Ez cayo ke mi xo kamufle kerdbi de 2 rojî menda. Dima ez semedo ke xo biresna embazan têgêraya. Mi Behdînan nêşinasnayêne. Ez ve rbi Behdînanî kewtî rayîr û hêraya embazan. Hêriş de mekapê mi zî mi pay ra vejîyabîy. Ez lingwarve rayîr a şîya. Mi kincê xo ra her deqa parçeyêk tira kerd, best linganê xo ra ke bieşka şora. Wexto ke ez cayê serebûtî ra tikî kewta dûrî ez ewnîya ci ra; uca de qet yew noqtaya leşkerî çinbîye.

Mi xo verda daristanêk. Zereyê nê daristanî ra patîkayêke derbaz bîyêne. Mi na patîka teqîb kerde û mi di embazê cinîyî dîyî. Ez zaf kêfweş bîya, mi venga înan da vat 'Şima heval ê?' Înan vat heya. Mi reyna heman perse nînan ra persa. Mi embazan rê qala serebûtî kerde. Wird embazî zî mat bîyî. Dima ke mi embazan ra tarîxê a roje pers kerd ez pê hesîyaya ke 16 rojî yo ez ha rayîr de ya. Tesadufêko manadar bi çunke nameyê nê wird embazan Hêvî û Roje (Tîje) bîyî. No mi rê ameyêne a mana ke ez bi hêvî ver bi tîje yanî ver bi partîye şina.

Eşkera yo ke na dafika bêbexte bi kamyew armancî ameya kerdene. Armancê înan esîrkerdiş yan zî birîndarkerdiş nêbi. Armancê înan şehîdkerdiş û îmhakerdişê koma ma bi. Eke armancê înan wina nêbîyêne tewr nêbo înan ma hîşyar kerdêne. Ê xizimkaran bi nê armancî ma dayî guleyab ver. Embazanê koma ma xeyal kerdêne ke şorê koyanê Dêrsim, Serhed û Botanî û biresê Kurdîstanê Azadî. Şarê Başûrê Kurdîstanî, ciwanê wayîrşeref û welatperwerî yê şarê kurdî, kesê ke do wayîrê çekanê nê embazan vejîyê wa bizanê ke nê xizimkaranê dewleta tirke ya îşxalkere senî bi hawayêkê namerdî hêrişê ma kerdo. Nê esasî ser o ganî pêro ciwanê kurdî wayîrê dewaya ma vejîyê. Ez zî heta peynî do rêçê nê çêran ser o şora.''